Virginie Ledoyen

Da Wikipedia.
C'l artìcul chè 'l è scrit in Miranduléś Emiliàn


Virginie Ledoyen, nada Virginie Fernández (Parìś, 15 ad Nuvémbar dal 1976), 'l è n'atóra francéśa.

Biugrafìa

Virginie Ledoyen in dal 2010

Fiōla dna famìja ad restauradōr 'd Aubervilliers, fiṅ da pìcula (dū an) la fà la mudèla tulénd in séguit al cugnóm ad "Ledoyen", ch'l éra quél ad sò nunóna da puta par part ad màdar e lasànd lè quél ad Fernández (ch'al daśgnìva da sò nunóṅ uriginàri dla Spaggna).

La fà al sò debùt a 'l cìnema a und'ś an in dal film itagliàṅ L'iniziazione ad Gianfranco Mingozzi e pò in dal 1991 la lavóra insém a Marcello Mastroianni e Ángela Molina in dla pelìcula Al làdar di baghét.

In dal 1995 la vèṅ numinàda p'r al Prèmi César (i Òscar francéś) par la sò part in dal film La Fille seule (La fiōla da par lē) e la gira un film par Claude Chabrol, Al buj in dla mènt, in dua l'è la fiōla bòna 'd un industriàŀ.

In dal 1999 la fà dla reclàm par la marca ad cuśmètic ad L'Oréal.

In dal 2000 la gira insém a Leonardo Di Caprio al film The Beach ad Danny Boyle e la s fà acsè cgnósar dimóndi a livèl internasiunàŀ.

Dū an dòp la vèṅ sarnìda par François Ozon par far Suzon in dal sò film Òt dóni e un mistēr e lè la gh'à manéra ad lauràr insém a Catherine Deneuve, Fanny Ardant, Isabelle Huppert e Emmanuelle Béart, vinsénd anc 'l Órs 'd Argènt a 'l Festival ad Berlìṅ cuma mijóra atóra.

In dal 2004 la gira un śal, Saint Ange e pò di àtar film in di an seguènt cuma 'l cumèdi Sōl un baś par piaśēr dal 2007 e Je vais te manquer (A t mancarò) dal 2008.

Al 29 ad Setémbar l'è dvintàda màdar ad Lila, la sò prima fiōla, e pò 'd Isaac, fiōl abû in dal Luj dal 2010 dal sò cumpàgn, 'l atōr franco-maruchèṅ Arié Elmaleh.

In dal sò caréra l'à laurâ da spés anc par la televiśiòṅ, girànd di lavōr cuma L'Eau froide 'd Olivier Assayas o I Miśerabìi (2000).

Soquànt di sò film

La Virginie Ledoyen la fà un surìś a Cannes in dal 2000
  • L'inisiasiòṅ (L'iniziazione) regìa ad Gianfranco Mingozzi (1987)
  • Al làdar di baghét (Le voleur d'enfants), regìa ad Christian de Chalonge (1991)
  • Al buj in dla mènt / La Serimògna (La Cérémonie), regìa ad Claude Chabrol (1995)
  • La fiōla 'd un suldâ la n piànś mai (A Soldier's Daughter Never Cries), regìa ad James Ivory (1998)
  • La spiàgia (The Beach), regìa ad Danny Boyle (2000)
  • 8 dóni e un mistēr (8 Femmes), regìa ad François Ozon (2002)
  • Ma chi è'l ch'l à masâ Pamela Rose? / Pistòli nudi (Mais qui a tué Pamela Rose?), regìa 'd Eric Lartigau (2003)
  • Sant Àngil (Saint Ange), regìa ad Pascal Laugier (2004)
  • Na top model in dal mè lèt (La doublure), regìa ad Francis Veber (2006)
  • The Backwoods - Parśunēr in dal bòsc (The Backwoods - Bosque de sombras), regìa ad Koldo Serra (2006)
  • Sōl un baś par piaśēr (Un baiser s'il vous plaît), regìa 'd Emmanuel Mouret (2007)

Culegamènt estéran