Ultimo mondo cannibale

Da Wikipedia.

C'l artìcul chè 'l è scrit in Miranduléś Emiliàn

Ultimo mondo cannibale

Massimo Foschi in na figùra dal film
Ùltim mónd canìbal
1977
Regìa: Ruggero Deodato
Scritōr: Giorgio Carlo Rossi
Gianfranco Clerici • Renzo Genta
Atōr: Massimo FoschiSuleimanJudy Rosly
Sheik Razar ShikurIvan RassimovMe Me Lay
Müsica: Ubaldo Continiello
Léngua: Itagliàṅ
Dürä dal film: 90 minüt
Nasiōṅ: Itàglia


«
Na stòria véra giràda fra 'l tribù in dua l'è sucèsa dabòṅ.»
(Tagline dal film)


Ultimo mondo cannibale (Ùltim mónd canìbal) 'l è 'n film ad scarésa dal gènar “canìbai” dal 1977 ad Ruggero Deodato.

A 'l èstar 'l è cgnusû anc c'n i tìtui ad “¡Mundo canibal! ¡Mundo salvaje!” in Spaggna, “Le dernier monde cannibale” in Frància, “De Laastse Kanninbalen” in Germàgna e “Jungle Holocaust” in di Stat Unî.

Sunt

'L antrupòlug Rolf (Ivan Rassimov), 'l inśgnēr Robert Harper (Massimo Foschi), al pilòta 'd aparéć Charlie (Sheik Razak Shikur) e l'infarméra Swan (Judy Rosly) i rìv'n in dla giùngla dgl'ìśuli Mindanao par pascàr-ag dal petròli par cònt dna cumpagnìa americàna. In sal pòst i gh'èṅ bèla qvéi dal Camp baś 4, Romand e Willer, ma i n rispóndan minga a la ràddio e pò al sò téndi i èṅ vōdi, giusà parchè. Quànd però Rolf al cata na lansa cun dal sangṿ, e pò anc na tèsta marsa, 'l è ciàr ch'in dla giùngla a gh'è di salvàdag dla tribù di Manabu, óm armàś a l'età dla préda e ch'i càmpan faghénd dal canibalìśum. Chi lōr, durànt la nòt, i ciàpan la Swan. La matìna gl'àtar tri i la vaṅ a pascàr ma Charlie al mōr subìt insfilsâ par na bòcia 'd śmalta impinìda ad spróc a punta ad bambù ch'a gh'è rivàda adòs a péndul, na trapla di salvàdag inśgnàda bèṅ.

Sinténd un fōg impìs, Rolf e Robert i vàn'n a védar da cla banda e i bècan i salvàdag litgàr-as la carna dla Swan ch'l'éra drē a cōśar. Adès a gh'è da scapàr via e in présia ma a n è minga un quèl fàcil catàr 'l aparéć stand in na giùngla. Rolf al s pèrd mént'r i éran drē a pasàr un fiùm in śatra e Robert 'l armàgn acsè da par lò. Pîṅ 'd fam al magna 'n funś ma pò al stà mâł, a gh vèṅ al gòmit vérd e al pèrd i sèns. Al vèṅ catâ subìt da i salvàdag e purtâ via. Ligâ atàc a na préda, i gh sćiàncan via tut i vistî e òṅ al gh tira via 'l arlói par magnàr-'s-al. La tribù la créd che lò al sia 'n uśèl e ch'al sàppia vulàr parchè 'l è rivâ in aparéć, i al mét'n acsè in na gàbia insém a 'n àquila. Al giōran dòp di baghét, par schèrs, i gh tìran di giaròṅ cóntar.

Quànd l'àquila la vèṅ druàda cuma lésca par ciapàr un cucudrìl da magnàr, Robert al capìs ch'al pròsim al sarà lò. Cun na préda dada in cô a dū salvàdag, 'l inśgnēr al s libra e al pòrta sèg la Palen (Me Me Lay), na dóna ch'la gh'iva mustrâ dla cumpasiòṅ faghénd-ag na pugnéta anc se lò 'l iva dmandâ dl'àqua. La gh sarvìs specialmènt par savēr qvél ch'a s pōl bév'r e qvél ch'a s pōl magnàr.

Mènt'r i scàpan via, lò al véd na dóna dar a la luś na putìna e pò butàr-l' in dal fiùm da magnàr p'r un cucudrìl. Robert al decìd dòp ad far-'s un bagn in dal fiùm ma al l'à pinsàda mâł parchè al s ciàpa soquànti sangvétuli adòs e la Palen la s in prufìta par scapàr via. Robert al s arlìa e al la và a pascàr. Quànd al la cata al gh mòla dū marùc par métar-la in riga e pò al la viulénta. Al dè dòp, quànd al s darséd, al cata dla ròba da magnàr, dla fruta e di àtar quèi ch'a n s sà minga cuś i sìan, pò la dóna la gh pòrt' anc un pés. Lung al viàś a salta fóra Rolf ch'l è incóra viṿ anc s'al gh'à 'n śnòć pîṅ ad matéria.

Culegamènt estéran