Scissors - Forbici

Da Wikipedia.

C'l artìcul chè 'l è scrit in Miranduléś Emiliàn

Scissors
Scissors - Forbici

La Sharon Stone in na figùra dal film
Fòrbśi
1991
Regìa: Frank de Felitta
Scritōr: Joyce Selznick • Frank de Felitta
Atōr: Sharon StoneSteve RailsbackMichelle Phillips
Ronny CoxVicki FrederickLarry MossWill Leskin
Müsica: Alfi Kabiljo
Léngua: Ingléś
Dürä dal film: 105 minüt
Nasiōṅ: Stat Unî


«
L'Angie l'è drē a pasàr 'l ustàcul. Tut qvél ch'a gh vōl l'è na cria 'd ajùt.»
(Tagline dal film)


Scissors - Forbici (Fòrbśi) 'l è 'n thriller psiculògic dal 1991 ad Frank de Felitta trat da 'n best sellers ad Joyce Selznick.

Sunt

L’Angela Anderson (Sharon Stone) la tira avànti miténd a pòst dal bàmbuli e di putòć śbragâ. Na matìna, dòp avér cumprâ un para 'd fòrbśi ch'i gh vōlan p'r al sò lavōr, la cata in d'l asinsōr ad cà un manìac ch'al gh mét al maṅ adòs par viulentàr-la. Lē la siga e dòp avér tirâ fóra 'l fòrbis da la sò burséta la gh i 'nsfìlsa in un bras. Chi lò al scapa via e al gh prumét ch'al gh la farà pagàr prèst. Più tard la cònta a la pulisìa qvél ch'l'à patî. La n à minga abû la manéra ad védar bèṅ al manìac, la sà sōl ch'l è 'n umòṅ cun la barba rósa.

In cal méntar chi lē la cgnós dū vśèṅ ad cà, i śmèj Morgan, ch'i gh daṅ cunfòrt in chi mumènt brut lè: Alex (Steve Railsback), atōr ad soap opera, e Cole (Steve Railsback), pitōr ardùt a vìvar in sna scrana a rudèli. Tut i dū i aṅ butâ 'l òć adòs a cla biónda lè e a pâr ch'al gh'àppia la méj al prim, anc se Cole al gh tîṅ dimóndi a dir-ag ch'al sò pigugnèṅ a gh funsióna listés anc s'l è armàś uféś in 'n incidènt. Ma l’Angie la gh'à 'n prubléma c'n i óm: la n gh piàś mia andàr a lèt sèg. A part al tintatìṿ ad viulénsa patî da pôc, da pìcula a gh'éra sucès anc un quèl brut, tant ch'adès l'è custréta a 'ndàr da 'n psicòlug, al dutōr Steven Carter (Ronny Cox), par saltàr-ag fóra. La dóna la gh cònta ch'la gh'à la fisa 'd 'n óm cun la barba rósa ch'al s ciàma Billy.

Un dè l’Angela la ricév na telefunàda ad lavōr: la gh'à 'd andàr a cà 'd 'n architét. Rivàda là l'armàgn srada dèntar e a n gh'è vèrs ad vèrar 'l us parchè qualchidòṅ 'l à śbragâ la marléta. In cambra da lèt la cata 'l architét mòrt, cun la fòrbśa ch'l'iva cumprâ cal dè là insfilsàda in dla schina. A s trata pròpria 'd 'l umòṅ cun la barba rósa. L’Angie la pèrd la tèsta, na curnàcia négra la gh diś ad cuntìnuv ch'l'è stada lē a cupàr-al. Méntar la dóna l'è imparśunàda là, Alex al ricév un telegràma fint in dua a gh'è scrit insìma che l’Angela l'è partìda par soquànt dè ma lò al n gh créd briśa parchè a gh pâr impusìbil ch'l'àppia lasâ a cà da par lē la sò gatìna, sénsa magnàr.

Culegamènt estéran