Scarpasòun

Da Wikipedia.

C'l artìcul chè 'l è scrit in Arzân Emiliàn

Al scarpasòun

Al scarpasòun l'é 'na specialitê ed Rèz, l'é 'na tōrta salêda fâta ed pâsta ed bēdi o/e spinâs.

Còl ch’égh vōl


  • P'r al d’ed dèinter

1 chîlo e mèz de spinâs o bēdi,
1 mâs ed sigulôt cun al gâmb frèsch e vèird,
‘na branchêda d’erbòuni,
60 gr ed lêrd ed persót o pansèta,
4 cucêr d’ ôli bòun,
50 g ed butēr,
2 spéch d’ âj,
4 o 5 branchêdi ed Grâna radû,
sêl e pèiver.

  • Per la pâsta

200 gr ed farèina,
'na nôş ed destrót,
2 cuciarèin d’ ôli bòun,
sêl e âcva tèvda.

  • Per la pâsta cun la ricôta

200 g ed farèina,
50 g ed ricôta,
'na nôş ed destrót,
2 cuciarèin d’ ôli bòun,
sêl e âcva tèvda

Preparasiòun

Desfêr in séma 'l fôgh al grâs dal persót cun l'âj schisê e i sigulôt tridê insèm a i gâmb. Zuntê l’ôli e al butēr e, dôp che i sigulôt a’srân gnû pâs sèinsa strinêri, unî i spinâs che préma î côt e strichê. Lasê insavurîr cun al sêl e al pèiver. Quând al tót al srà dvintê frèd, tulî via l'âj, zuntê al j-erbòuni tridêdi fîni e al Grâna. Preparê la pâsta e, dôp avèirla fâta arpunsêr per 'na mèz' ōra, dividîla in dō pêrti. Tirê ‘na pêrta cun la canèla, punsêla ind al stâmp bsuntê cun l’ôli e vudêgh in séma 'l pést. Tirê cl'êtra pêrta pió sutîla ‘d la préma, infarinêla e arvuiêla ind la canèla, ânca lê infarinêda: strichê i dû cò ‘d la pâsta vêrs al cèinter ‘d la canèla e lasê blişghêr la pâsta increspêda in séma 'l pést. Dôp avèirla tóta sfuracêda cun 'na fursèina, metî al tót ind al fôren a 200°. Lasê per circa 'na mèz' ōra; apèina préma ch'l'âbia finî ed cōşer, bzuntê al d’ed sōver cun un pès ed lêrd. Turnê a mèter ind al fôren e cavê dôp pôch minût.
Al scarpasòun l’è prûnt.


Colegamèint estèren