Sandro Bondi

Da Wikipedia.
C'l artìcul chè 'l è scrit in Miranduléś Emiliàn


Sandro Bondi 'l è un pulìtic, scritór e puéta itagliàṅ nâ a Fivzàn al 14 ad Maǵ dal 1959.

Dòp èsar-'r fat i òs in dla federasiòṅ cumunìsta di śóvan ed èsar stâ al sìndic ad Fivzàn p'r al partî cumunìsta, al pasa in di an Nuànta a Forsa Itàglia. Dal 2008 al 2011 'l è stâ al minìstar di bèṅ culturài in dal guvéran Berlusconi IV.

Al minìstar Sandro Bondi

Biugrafìa

Fiól ùnic ad Renzo Bondi, uperài cun di pinsér sucialìsta, e ad Maria Bertoli, al spatìna cun la famìja in Svézzra in du al pasa la sò infànsia e al stùddia in dal scóli ad Luśànna. Turnâ in Itâglia in dal 1970, al cuntìnua i sò studi al Lìceo sintìfic "Leonardo da Vinci" ad Vilafrànca.

Studi e lavór fat in dal Partî Cumunìsta

Sandro Bondi al s iscrìv bèṅ prèst a la federasiòṅ cumunìsta di śóvan e al dvénta al segretàri dla Lunigiàgna. In dal 1984 al s làurea in Filuśufìa près l'Università ad Piśa cun na téśi su frâ Leonardo Valazzana, anca lò ad Fivzàn, predicadór agiustigniàṅ ch'al s éra mis còntra a Girolamo Savonarola.

Al fà al ricercadór in d'l università ad Firänz, al mìlita in dal Partî Cumunìsta e in cal mèntar al fà 'l asicuradór par l'Unipol. In dal 1987 al lavóra par du an a 'l incìrca p'r al giurnàl Il Tirreno.

In dal 1990 al dvènta al sìndic ad Fivzàn p'r al PCI, ma in dal 1992 la sò giùnta la vèṅ butàda śò par di sucialìsta lucài in cumbùta cun la Demucràsia Cristiàna. Bèla in alóra al gniva paragunâ par burla a un ravanèl: rós ad fóra e biànc dèntar.

Bondi al lasa pò al PCI.

Caréra pulìtica in Fòrsa Itàglia e in dal Pòpul dla libertà

Par mèś dal scultór Pietro Cascella, ch'l éra drē a lauràr a la capèla funerària ad Villa Berlusconi, in dal 1994 al cgnós Silvio Berlusconi ch'al gh dà 'l incàrag dla diresiòṅ dal Dipartimènt di bèṅ culturài dal Sèntar studi ad Fòrsa Itàglia, al sò partî. In sèguit Bondi al taca a tgnir a drē a la pòsta ad Berlusconi e al dvèṅ al sò segretàri particulàr e culaburadór.

Durànt la campàggna di elesiòṅ dal 2001 al tîn a drē al lìbar futugràfic Una storia italiana (Na stòria itagliàna) ch'al gh'à dèntar al fòto privàdi e pùbblichi ad Berlusconi e un sunt ad tut quél ch'l à fat in dla sò vita. Al lìbar al vèṅ mandâ in dal cà ad tut gl'Itagliàṅ.

Bondi al fà védar 'd èsar-gh fedél, dascurénd sèmpar bèṅ ad lò in pùblic e faghénd-ag dal pueśìi cuma quésta chè 'd sóta:

«
Vita assaporata, Vita preceduta, Vita inseguita, Vita amata. Vita vitale, Vita ritrovata, Vita splendente, Vita disvelata, Vita nova.»
(IT)(A Silvio)
«
Vita gustàda, Vita ch'la gh'à quèl prima, Vita tgnuda drē, Vita amàda. Vita vitàla, Vita catàda incóra, Vita ch'la brila, Vita dasquaciàda, Vita nóva.»
(MUD)

'L à fat anc di scrit par sò mujér Veronica Lario (A Veronica Lario in Berlusconi) e a Michela Vittoria Brambilla (A Michela Vittoria Brambilla, alias Crudelia Salmon) ch'la tgniva drē a Sìrcui dla Libertà prima ad dvintàr minìstra dal Turìśum.

«
Ignara bellezza, Rubata sensualità, Fiore reclinato, Peccato d’amore.»
(IT)(A Michela Vittoria Brambilla, alias Crudelia Salmon)
«
Belésa ch'la n sà gnint, Turbamènt sesuàl rubâ, Fiór culgâ śò, Pcâ 'd amór.»
(MUD)

In dal 2001 'l è elèt a la Cambra di deputàt in dla lista ad Fòrsa Itàglia in dla tèrsa circuscrisiòṅ (Lunbardî 1) e al fà al sò ingrès in dla Cumisiòṅ di afâr custitusiunàl dla Cambra. Dal 2002 al dascór uficialmènt par quéi ad Fòrsa Itàglia.

In dla campàggna di elesiòṅ regiunàli dal 2005 al s dà da far par la cumunicasiòṅ dal partî e in c'l an lè al vèṅ numinâ curdinadór dal muvimènt.

In di elesiòṅ pulìtichi dal 2006 al vèṅ elèt incóra in dla circuscrisiòṅ XX (Canpâgna 2). Al lavóra in cal mèntar p'r al setimanàl Vanity Fair in du al scriv al sò pueśìi.

In di elesiòṅ dal 2008 al vèṅ èlet al Senàt dal Repùbblica par la regiòṅ Tuschèna p'r al Pòpul dla Libertà. In séguit al s càndida p'r la presidènsa dla Provincia d' Masa-Carara ma al pèrd al balutàǵ còntra Osvaldo Angeli ch'al vins cun al 55,37%.

Dòp al cungrès fundatìṿ dal Pòpul dla libertà al vèṅ numinâ curdinadór insém a Ignazio La Russa e Denis Verdini.

In dal 2008 'l è numinâ Minìstar di Bèṅ Culturài ma pò al 23 ad Mars dal 2011 al pasa a la maṅ a Giancarlo Galan (ex presidènt dal Vènet).

Scòntar e prubléma durànt al sò mandâ ad minìstar

Bondi, in dla sò vèst ad minìstar, al s è questiunâ dimóndi vòlti cun al Cunsìli Superiór di Bèṅ Culturài e cun al sò presidènt Salvatore Settis. Chi lò in dal 2008 'l iva denunciâ al taj da piò 'd un migliàrd 'd euro da i bèla màgar fónd dal ministér.

Sempar in dal 2008, Settis e al Cunsìli Superiór i s éran mis còntar a la deciśiòṅ ad dar in prèst di diśégn ad Leonardo da Vinci a un muśèo dal Nevada, cuma dmandâ da Alain Elkann, śéndar ad Gianni Agnelli e cunsulènt ad Bondi, pur cònt'r al parér dla diretóra dla Bibliutéca Reàla ad Turén, custòdi da gl'òpri.

Settis al s è mis ad travèrs anc al cumisariamènt ad l'arèa archeulògica rumàna (dada a Guido Bertolaso) insém a i funsiunàri dal suprintendénsi ad Róma e Òstia e a quàtarmila fra prufesór universitàri e strudióś itagliàṅ e ad 'l èstar. Par Settis, cal lavór lè al miràva a tór via i putér dal suprintendénsi e al sarév andâ in pòrt anc par mèś ad mancàdi misi a pòst e giuràdi ad trasferimènt. In séguit anc al sit ad Pumpèi 'l è stâ cumisariâ par Bondi e dâ al prefèt Renato Profili par tgnir-gh a drē, ma lì lò, sensa di fónd suo, 'l à tòlt quéi dla suprintendénsa.

La questiòṅ l'è finìda cun al dimisiòṅ ad Settis e di àtar mémbar dal Cunsìli Superiór in dal Favràr dal 2009.

Durànt la vèrta dal Festival dal cìnema ad Róma, al 28 'd Utóbar dal 2010, 2.800 lavuradór dal setór, cun anc l'apòǵ di atrìś Keira Knightley e Eva Mendes, i prutèstan sèg p'r i taj dal FUS (al Fónd Ùnic p'r al Spetàcul). Bondi al fà un cumunicàt in du al diś che la prutèsta l'è «sénsa mutìṿ, fasióśa e sénsa rispèt ad chi àtar».

Al 6 ad Nuvémbar dal 2010 i vènan śò a Pumpèi la Domus di Gladiadór a di àtar mur lè 'd intóran. La nutìsia la fà al gir dal mónd tant ch'i rìvan in présia di ispetór ad 'l UNESCO. A la Cambra a vèṅ subìt preśentàda na musiòṅ ad sfidùcia còntra al minìstar ch'la và a i vōt al 26 ad Śnar dal 2011. Bondi al tîn sòdi la sò scrana parchè la vutasiòṅ l'è a sò favór: 314 a 292.

Vita privàda

In dal 1993 al cata incóra na sò vècia cumpàgna ad scóla, Gabriella Podestà, al la spòśa du an dòp e al gh fà un fiól sèg, Francesco, nâ in dal 1998, ma pò in dal 2009 al s divìd uficialmènt. In dal 2010 la Podestà la diś al setimanàl L'Espresso che durànt al matrimòni sò marè al l'arév piciàda in cà, dand-ag dal bòti e dal punisiòṅ.

Dal 2008 Bondi al viṿ insém a Manuela Repetti, una ch'la vénd dal cà par cònt ad chi àtar, fióla 'd un custrutór ad Nóṿ Lìgur, dvintàda parlamentàra dal PDL in cal stés an.

Òpri

  • Pietro Cascella. Parole e pietre 1992.
  • Frate Leonardo Vallazzana. Agostiniano, predicatore e avversario di Girolamo Savonarola 2002.
  • Tra destra e sinistra. 1994-2004, la nuova politica di Forza Italia 2004.
  • La civiltà dell'amore. Politica e potere al femminile 2005.
  • Laici e credenti. Una fede comune. La sfida della ragione e la cultura della vita 2006.
  • Perdonare Dio. Poesie 2005-2006 2007.
  • Fra le tue braccia 2008.
  • Io, Berlusconi, le donne, la poesia, Claudio Sabelli Fioretti 'l intervìsta Sandro Bondi, 2008.
  • Il sole in tasca. L'utopia concreta di Adriano Olivetti e Silvio Berlusconi 2009.