Renato Brunetta

Da Wikipedia.
C'l artìcul chè 'l è scrit in Miranduléś Emiliàn


Renato Brunetta 'l è un pulìtic itagliàṅ dal Pòpul dla Libertà, scritór, insgnànt universitàri e ecunumìsta nâ a Venèsia al 26 ad Maǵ dal 1950. Da 'l 8 ad Maǵ dal 2008 al gh'à la carga ad minìstar dla Pùblica Aministrasiòṅ e par l'Inuvasiòṅ in dal guvéran ad Silvio Berlusconi.

Biugrafìa

Al minìstar Renato Brunetta

Anc s 'l éra al fiól d'òṅ ch'al gh'iva un banc 'd ambulànt a gh'la cava listés a tór la laùrea in Siénsi Pulìtichi e ecunómichi al 2 ad Luj dal 1973 près l'università ad Padva. Al taca pò a lauràr in d'l àmbit acadèmic in fiṅ al 2009, an dal sò pensiunamènt.

Al dà al sò impégn anc in pulìtica, a 'l inìsi p'r al Partî Sucialìsta e pò par Fòrsa Itàglia a partìr dal 1999 quand al vèṅ elèt al parlamènt europeo. In dal 2000 al próa a dvintàr al sìndic dla sò sità ma al pèrd còntra Paolo Costa dal sèntar-sinìstra.

Al stà incóra in d'l Europarlamènt in fiṅ al 2008 e pò al dvénta mìnistar dla Pùblica Aministrasiòṅ e par l'Inuvasiòṅ dla Repùblica. Al taca subìt la sò guèra còntra i bondagnìnt e scansafadìghi ad dipendènt pùblic. In cal mèntar par la criśi al gh tèṅ férum i stipéndi par tri an e pò al fà pasàr un prinsìpi: al 25% ad chilór 'l è brav par definisiòṅ e al mèrita al 50% 'd incentìṿ, 'n àtar 50% al fà sól al sò duvér e al gh'à dirìt a c'l àtar 50%, quéi ch'i rèstan i èṅ di bondagnìnt e 'l è giùst ch'i n ciàpan gnint.

Durànt al sò mandàt al próa incóra a dvintàr al sìndic ad Venèsia, dgénd ch'al prév far tut i du i lavór insém, ma al vèṅ trumbâ anc stavòlta al prim tùran cun 42,6% di vōt còntra al 51,1% ad Giorgio Orsoni. Al dà pò la cólpa a la Léga Nòrd.

Durànt la traśmisiòṅ dal 18 ad Śugn 2008 ad Matrix 'd Enrico Mentana al diś ch'al gh daspiàś dimóndi 'd n èsar-'s minga impgnâ a fónd par vìnsar al Prèmi Nòbel parchè «A sira anc brav, a sira, a n dig minga, lè lè par far-al, però a sira in dla via bòna... a-j-ò vlû tgnir a drē al mè amór par la pulìtica e al Prèmi Nòbel al n al vinsarò mai piò».

Pulèmichi

Par via dal sò stìl sćèt, Brunetta al s è misćiâ dimóndi vòlti in pulèmichi vari. Ca-li chè quéli più impurtànti:

  • Al 2 'd Avrìl dal 2009 al s è quistiunâ cun la sò culéga Mara Carfagna p'r avér dit «Al lavór pùblic 'l è druâ dimóndi vòlti par śbarcàr al lunàri, specialmènt da part dal dóni ch'i vànan fóra a far al còmpri durànt 'l uràri ad lavór».[1]
  • Al 28 'd Avrìl dal 2009 a Parma, in ucaśiòṅ dal prim dè ch'al cumùṅ al spianàva 'l emoticon (facìni ch'i rìdan o ch'i piànśan, sarnìdi da i utènt, ch'i servìsan par miśuràr al gradimènt di servìsi pùblic), al diś a di cuntestadōr dla CGIL che al lōr «'l è al sindacàt di bòndagnìnt». E pò al śònta «Al mè sógn 'l è quél che tuti gl'aministrasiòṅ cumunàli i sìan cuma quéla ad Parma» dal sìndic Pietro Vignali.[2]
  • Al 27 ad Maǵ dal 2009 a Klauscondicio al fà na sparàda còntra i pulisiòt «A gh'è da mandàr i pulisiòt p'r al stradi. Ma a n è minga fàcil far-al: a n s pól briśa mandàr in strada al pulisiòt pansòṅ ch'in dla sò vita 'l à fat sól al pasacàrti parchè in strada i s al màgnan» scatnànd dal pulèmichi da part di sindacàt dla pulisìa.[3]
  • 'L 11 ad Setémbar dal 2010, in n'intervìsta a il Giornale al diś: «S'a n gh'is-am minga la Calàbria e al pès ad teritòri Nàpuli-Caśèrta, o méj se cal śòni lè i gh'ìsan di standard cumpàgn ad quéi dal rèst dal Paéś, l'Itaglia la sarév al prim Paéś in Europa».[4]
  • Al 14 ad Śugn dal 2011, durànt un cunvégni su l'inuvasiòṅ a Róma, quand al capìs ch'l'è na precària, al mòla lè na dóna ciamàda da lò in sal palc par far-ag na dmanda e al s in và dgénd «A t ringràsi, arvéd'r-as, bòngióran. A sîv al pèś dl'Itàglia». Prima 'd andàr via, minga cuntènt dal tut, al sćianca anc un strisiòṅ cun scrit in sima «A sa scriv inuvasiòṅ, a s lèś lavōr precari».[5]

Culegamènt estéran

Nòti

  1. Litgàda fra Brunetta e la Carfagna agi.it, 2 'd Avrìl dal 2009
  2. La CGIL 'l è al sindacàt di bòndagnìnt repubblica.it, 29 'd Avrìl dal 2009
  3. In pulisìa a gh'è tròp pansòṅ corriere.it, 2 'd Avrìl dal 2009
  4. Sénsa Nàpuli e Caśérta prim in Europa repubblica.it, 11 ad Setémbar dal 2010
  5. Brunetta al n rispónd minga a i precàri: «A sîv al pèś dl'Itàglia» corriereadriatico.it, 15 ad Śugn dal 2011