Putèṅ Ìndag

Da Wikipedia.
C'l artìcul chè 'l è scrit in Miranduléś Emiliàn
Al culōr ìndag, cum 'l è in dal sèst chakra

Putèṅ ìndag (Bambini indaco in itagliàṅ, indigo children o indigos in ingléś) 'l è un cuncèt sientìfic o śò da 'd lè nâ in d'l àmbit dla cultùra New Age ch'al figùra na generasiòṅ ad putèṅ ch'i sarésan bòṅ ad far dal ròbi speciàli, da 'd là dal naturàl.

Al fenòmen, descrìt da soquànt autōr bèla in riferimènt a i an Ssanta, al sarés carsû da i an Nuànta a stà banda, ségn dl'evulusiòṅ dla spéce umàna davśèṅ a gnir, tgnénd a drē a i pinsēr New Age. Chi lōr i crédan ch'i putèṅ ìndag i purtaràṅ a un mónd nóṿ sénsa guèri e sénsa inquinamènt.

L'espresiòṅ Putèṅ ìndag l'è stada pinsàda in di an Stanta par la parapsicóluga Nancy Ann Tappe ma l'à muciâ sù d'l interés dòp la publicasiòṅ dal lìbar The Indigo Children scrit par Lee Carroll e Jan Tober in dal 1999. Par lōr, la generasiòṅ ch'la gnarà dòp ad lōr la sarà quéla di Putèṅ ad cristàl.

I putèṅ ìndag i vènan descrìt cuma putèṅ ch'i gh'aṅ un caràtar particulàr, pîṅ 'd empatìa e vója 'd èsar creatìṿ, cun na fórsa 'd anìm dimóndi élta. I gh'aṅ anc di putēr paranurmài cuma la telepatìa e 'l èsar bòṅ ad védar di quèi, avenimènt, pòst e śavàj luntàṅ, in dal tèmp o in dal spasi, o anc lugâ. I pōlan mét'r-as in cuntàt cun i àngil e i èṅ curiōś, inteligìnt, intuitìṿ e purtâ p'r al spirituàl.

Carroll e Tober i vaṅ còntra 'l idéa di dutōr che chi putèṅ chè, ch'i gh'aṅ la Sìndrum dal deficit 'd atensiòṅ e dal diav'l adòs cuma la cantànta Britney Spears, i sìan malâ dabòṅ, ma sōl biśugnōś d'atensiòṅ in sal piàṅ spirituàl e briśa ad curi mèdichi.

I siensiâ i gh daṅ però còntra parchè i dìśan ch'i n gh sìan minga dal próvi véri in apòǵ a cal pinsēr lè. Soquànt autōr, cum al psicòlug Russell Barkley, i àṅ pò fat nutàr che dimóndi ad chi caràtar lè, mis insém a i putèṅ ìndag, i èṅ acsè genèric ch'i pōlan andàr bèṅ praticamènt a tut.

Culegamènt estéran