Ptòun avtomàtic

Da Wikipedia.
C'l artìcul chè 'l è scrit in Carpśàn Emiliàn
Un ptòun a presiòun in sìma a 'na pèla, in dû 'l màsć 'l è in élta e la fèmna 'd sòta

Al ptòun avtomàtic, ciamê anca ptòun a presiòun 'l è cal ptòun ed metâl o 'd plâstica ch'al sèra di vistî, del giàchi o di giubòt quànd al sulamèint 'l à da èser śvélt, pràtic e robùst.

'L è furmê da dū cumpunèint 'l ùn in fàcia a cl èter in dal dū bàndi 'd giachèt ch'a bśògna sulèr: al màsć, cun un pirulèin bumbadèin in fóra, e la fèmna, śbuśìda e cun 'na mòla cìca mo robusta per tgnìr strìc al masć ch'à s egh cùcia dèinter. 'L è pràtic perchè per sulèr, al ptòun al và cucê e per dessulèr al va destachê vìa 'd sèc, sàinsa śmachinèr de piò.

La só aplicadûra

Per tachèr i ptòun avtomàtic ai vistî (mo anca a di burslèin, a 'l bórsi, a 'l sìngi e via descurènd) a gh'è biśògn 'd un turchièt, mèj s'l è cun l'aria cumprèsa, cun in sìma i punśòun 'd volta in volta giùst p'r el diferèinti am'śùri e fórmi 'd ptòun: al schisamèint sòta 'l só punśòun dal cumpunèint masć o 'd quèl fèmna, atàc al pès ed stòfa o 'd pèla ch'a gh' è biśògn, al fisarà definitivamèint i dū cumpunèint al pês, pròunt per la suladùra.

Vôś lighèdi

Manéri 'd dîr

  • (EGL) Tachèr di ptòun, (IT) Attaccare delle pezze, cominciare dei discorsi lunghi e noiosi.
  • (EGL) Tachèr ptòun, (IT) Cominciare un approccio parlato (per provarci).

Culegamèint estèren