Phenomena

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg Phenomena
Phenomena.png
la Jennifer Connelly e la Daria Nicolodi in na figùra dal film
Phenomena
1985
Regia: Dario Argento
Scritùr: Dario Argento • Franco Ferrini
Atùr: Jennifer ConnellyDonald PleasenceDaria Nicolodi
Dalila Di LazzaroPatrick BauchauMario Donatone
Federica MastroianniFiorenza TessariMichele Soavi
Müsica: Simon BoswellGoblinClaudio Simonetti
Bill WymanIron MaidenMotörheadAndi Sex Gang
Dürä dal film: 111 minüt
Lengua: Itagliàn
Nasiòun/Paèiş: {{{Nasiòun/Paèiş}}}


«
Ca'l chè cuśa gh'éra ad dèntar dal guànt... i èṅ di bègatèṅ dna mósca, la Sarcòfaga Granda. La magna sōl di cadàvar e di rèst umàṅ»


Phenomena 'l è 'n film ad scarésa dal 1985 ad Dario Argento, ambintâ e girâ tut in Śvisra, a part soquànti séni in di Elios Studios ad Róma. In di Stat Unî i al cgnósan cuma Creepers.

Sunt

Na turìsta danéśa, Vera Brandt (Fiore Argento), la pèrd 'l àutobus in si mónt śvìsar e la và in na bàita par dmandàr ajùt ma lè la cata invéci la mòrt mént'r a s véd 'n óm in cadéni ch'al fà da tut par libràr-as. La tèsta tajàda via dla pòvra ragasóla la vèṅ pò butàta śò in un fiùm. Soquànt tèmp dòp la Jennifer Corvino (Jennifer Connelly), fiōla d'l atōr americàṅ Paul Corvino, la s iscrìv a un culéǵ par fémni dal pòst, al "R. Wagner", e i la métan in cambra insém a la Sophie (Federica Mastroianni). A purtàr avànti la scóla l'è na diretóra ch'la n lasa pasàr gnint (Dalila Di Lazzaro) cun a fiànc la Frau Brückner (Daria Nicolodi), na dóna sò para.

La Jennifer ad nòt la gh'à di atàc ad sunambulìśum e, quànd a gh sucéd, la n pōl far a méno ad tōr-as sù e tacàr a far dū pas lè 'd intóran. Na sira, durànt òṅ ad chi gir lè, prilànd-as da na banda in diresiòṅ dna fnèstra, la véd la studénta Gisela Sulzer (Fiorenza Tessari) ch'la riva lè da lē sigànd. A 'l impuvìś un bulsòṅ sparâ a 'l sò spali al s insfìlsa in dla sò gnuca gnénd pò fóra da la bóca, masànd-la. Qvala là, a n psénd far gnint par farmàr-as, la tira drit, sénsa rénd'r-as cònt dal tut ad quél ch'l'à vdû, prima ad cascàr śò da 'l curniśòṅ. Tgnénd pò a drē a na sìmmia, ciamàda Inga, Jennifer la riva a cà 'd 'n entumòlug, al prufesōr John McGregor (Donald Pleasence), ch'al viṿ in na scrana a rudèli e ch'l è drē a strudiàr la tèsta marsa dal tut e pina ad bègatèṅ dla Brandt, purtàda lè da 'l ispetōr Rudolf Geiger (Patrick Bauchau) e dal sò asistènt Kurt (Michele Soavi). Difàti, guardànt al cicclo ad vita ad chi bgòṅ lè, chi lò al sarés bòṅ ad dar na dada a 'l masamènt. Jennifer la gh diś che lē la n gh'à minga sacrésa di insèt, ansi la gh vōl bèṅ e l'è anc bòna ad dascórar sèg, a livèl telepàtic. Invéci al prufesōr al dascór da spés cun l’Inga, bèstia dimóndi inteligìnta ch'la gh dà al sò ajùt, e al gh diś ad lasàr śò al raśōr parchè la s pōl far dal mâl a tgnir-'l in maṅ. John al cònta a l'americàna che in dal pòst a gh'è un manìac necròfil ch'al masa al ragasóli par pò tgnir da cat i còrp. Anc la sò asisténta Greta l'è stata cupàda da lò.

Turnàda in dal culéǵ, la Jennifer la patìs incóra 'n epiśòdi ad sunambulìśum, cun na luśla ch'la la pòrta da drē da na sēṿ faghénd-ag catàr un guànt d'l asasèṅ, cun di bègatèṅ dèntar. Al manìac al và avànti incóra cun i masamènt, faghénd fóra prima la Sophie e pò incóra McGregor sót a i òć dna Inga fóra ad tèsta.

La Jennifer la in vōl più savér, la ciàma sò pàdar par turnàr subìt a cà in aparéć ma la gh'à da spétar incóra un dè e la Frau Brückner la gh śibìs na cambra par durmìr la nòt a cà sua. Rivàda là, Jennifer la véd che tut i spèć i èṅ quaciâ da di sugamàṅ e la Brückner la gh cònta ch'la gh'à un putèṅ dimóndi malâ ch'al n vōl briśa véd'r-as lè e pò la gh dà na madśìna par far-ag pasàr la févra. Jennifer la và in bagn par tōr-la ma pò la stà mâl e la s fà gnir 'l urt dal gòmit par sputàr-la 'd fóra. L'americàna la véd anc ch'a gh'è di bègatèṅ dapartùt, atàc a 'l savòṅ e a i sugamàṅ, e lè la capìs incòsa.

Culòna Sunóra

La culòna sunóra ad Phenomena 'l è gnuda fóra su disc in dal 1985 e su CD in dal 1987 p'r òpra dla Cinevox Record e la gh'à dèntar 12 braṅ.

  1. Phenomena (04:24) • Claudio Simonetti
  2. Flash of the blade (04:08) • Iron Maiden
  3. Jennifer (03:50) • Goblin
  4. The quick and the dead (03:32) • Andi Sex Gang
  5. You don't know me (02:35) • Andi Sex Gang
  6. The wind (01:16) • Goblin
  7. Valley (04:30) • Bill Wyman & Terry Taylor
  8. Sleepwalking (03:50) • Goblin
  9. Locomotive (03:21) • Motörhead
  10. Jennifer's friends (03:27) • Goblin
  11. The maggots (01:36) • Simon Boswell
  12. The naked and the dead (02:45) • Andi Sex Gang

Ròbi curióśi

  • In sal sit uficiàl ad Daria Nicolodi, mujér ad Dario Argento e Frau Brückner in dal film, a s pōl lèśar un pès dn'intervìsta data a "Primavisione Cinematografica" n.9 dal Setémbar dal 1985, in dua lē la gh và śò péśa dgénd «A mè i film ad scarésa i m piàśan dimóndi e Dario 'l è dimóndi braṿ. A gh'ò però da far un dascórs a part par "Phenomena", un film che da 'n sèrt punt ad vista a but da na banda. Minga parchè al n sia mia vàlid, mè a 'l cat fat bèṅ, ma par quél ch'al cònta; mè a m tóg a cōr al prubléma di handicapâ e in "Phenomena" a s vèṅ a savér a la fiṅ che gl'asasèṅ i èṅ un putèṅ dasfurmâ e sò màdar ch'la masa par difénd'r-al. Inóltar in dal film i bòṅ i èṅ pîṅ ad bèsi e bèi mént'r i catìṿ i èṅ brut e in buléta. La m è parsa n'òpra dimóndi reasiunària, e un bèl pas a 'l indrē ad Dario, un regìsta ch'al m è sèmpar piaśû ma ch'a n vój piò lauràr sèg, in fiṅ tant ch'al cuntinuarà par cla strada lè»[1].
  • Al fiōl dasfurmâ ad Frau Brückner 'l è fat in dal film da 'l atōr napulitàṅ Davide Marotta mascrâ e trucâ da Sergio Stivaletti par far in manéra ch'al gh'is la sìndrum ad Patau.
  • P'r al film i èṅ stâ druâ 40 migliòṅ 'd insèt, tirâ sù a pòsta.

Culegamènt estéran

Nòti