Pelòpia (fiōla 'd Tièste)

Da Wikipedia.

C'l artìcol chè 'l è scrit in Carpśàn Emiliàn


Pelòpia (Πελόπεια in gréc), in dla mitulugìa gréca, l' è la fiōla 'd Tièste e sacerdotèsa 'dla dea Aténa a Sicyone śvèin al re Thesprotos.

Al pèder 'd lē, al Tièste, 'l éra sèimper in na maledèta lota cul fradèl Atrèo per regnèr a Micéne. Dòp dal vendèti ed sàng'v ch' i n' finìven piò, 'n oràcol al predìva al Tièste che sól al fiōl che lò 'l ìs avû da la só stèsa fiōla Pelòpia, 'l avrèv mìs fin a la fàida infinìda e 'l gh' avrèv permìs ed guvernèr finalmèint in sìm' a Micéne. Al Tièste al s prèsta a la violasiòun 'd la só stèsa fiōla cun la ghigna quacèda p'r an fèr-es cgnùser. Mo però lē l' è anca lesta a robèr-eg la spèda prìma che lò 'l scapa vìa.

In cal mèinter, al chèś al vól che 'l Atrèo al vaga a la cort ed Thesprotos e 'l vója tór per mujér pròpi la Pelòpia. Piò tèrdi, apèina a nasarà al putèin, ciamê Egìsto, la mèder la 'l spòun fóra e lò al vgnarà catê e latê da di pastōr cul lat ed chèvra (in gréc αις, 'd in dû al só nòm Αἴγισθος, Egìsto). Vlend pò alvèr al fiōl, che 'l Atrèo al crèd suo, i 'l turàn indrê in cà. 'L Egìsto, dvintê grandèin, al vgnarà tolt dèinter la vècia fàida da 'l Atrèo, ch' al ghe dmandarà 'l aiùt per masèr al Tièste e quand 'l Egìsto al tirarà fóra la só spèda per cupèr-'l in dal sòn, al Tièste al se scansa e 'l arcgnùs in quela lè la só vècia spèda rubèda i an indrê, e acsè al ghe spiéga sìa a 'l Egìsto e sìa a la Pelòpia che pròpi lò 'l è 'l pèder 'd al ragàs. Pelòpia a sintìr-el, la s masa a 'l istànt cun cla stèsa spèda, mèinter che 'l Egìst al cur a masèr 'l Atrèo e insèm al só ver pèder Tièste, i andràn a guvernèr a Micéne.


Vóś lighèdi


Colegamèint estèren