Omen - Il presagio 6+6+6

Da Wikipedia.

C'l artìcul chè 'l è scrit in Miranduléś Emiliàn

The Omen
Omen - Il presagio 6+6+6

La Farrow, la Stiles e Schreiber in na figùra dal film
Omen - Al preśàgi 6+6+6
2006
Regìa: John Moore
Scritōr: David Seltzer
Atōr: Liev SchreiberJulia StilesMia Farrow
Seamus Davey-FitzpatrickPete Postlethwaite
David ThewlisMarshall CuppCarlo Sabatini
Giovanni Lombardo RadiceRafael Sallas
Müsica: Marco Beltrami • Jerry Goldsmith
Léngua: Ingléś
Dürä dal film: 150 minüt
Nasiōṅ: Stat Unî


«
Da 'l mâr etèran lò al s léva sù, créand di eśèrcit da tut i dū al bandi, miténd 'l óm cóntar sò fradèl, in fiṅ tant che i óm i n gh saràṅ piò.»
(Tagline dal film)


Omen - Il presagio 6+6+6 (The Omen) 'l è 'n film ad scarésa americàṅ dal 2006 girâ par John Moore.

'L è 'l arfacimènt 'd un film dal 1976, Omen - Il presagio, al prim dla sèrie dal Preśàgi ch'la gh'à abû anc tri séguit: Omen II - La maledizione di Damien (1978), Omen III - Conflitto finale (1981) e Omen IV - Presagio infernale (1991).

La pelìcula, ch'l'à catâ sù un squantèr'n ad bèsi, sènt-vint migliòṅ ad dòlar a frònt 'd un budget ad vint-sinc, l'è stada giràda a Praga e a Matéra. In di cìnema l'è vguda fóra al 6/6/06 a 06:06:06 óri dla matìna, p'r arcurdàr al nùmar dla bistiàsa, al 666.

Sunt

Robert Thorn (Liev Schreiber), 'l è 'n diplumàtic americàṅ ch'al viṿ in Itâglia insém a sò mujér Katherine (Julia Stiles). Chi lē la gh'à 'd avér fiōl. Dòp avér aburtî par dū vòlti in pasâ, n'atra daśgràsia l'è lè ch'la la spèta parchè 'l putèṅ al nas mòrt. Al prevòstar d'l uśdàl, pàdar Spiletto (Giovanni Lombardo Radice) al gh śibìs alóra ad far un scambi ad cuni par tōr a 'l sò pòst un putèṅ dna dóna ch'l'éra mòrt ad part. P'r a n far piò patìr sò mujér, Robert al diś ad sè e al tōś Damien (Seamus Davey-Fitzpatrick) fra i sò bras sénsa cuntàr gnint a la Katherine.

In dal gir ad sinc an i sucédan pò dū fat ch'i gh càmbian la sò vita. Prima a mōr p'r al stradi ad Róma 'l ambasadōr americàṅ Steven Haines (Marshall Cupp) quànd la sò màchina la ciàpa fōg bruśànd-al viṿ, pò al dè dal cumpléan ad Damien la badànta ad sò fiōl (Amy Huck) la siga da 'l téǵ dla scóla «Guàrd-um Damien, a 'l fag giùst par tè!» prima 'd impicàr-as butand-as śò a pēś mòrt cun na lasa a 'l còl. Robert, ch'in cal méntar 'l iva fat caréra dvintànd ambasadōr in dal Régn Unî, al vèṅ davśinâ da pàdar Brennan (Pete Postlethwaite) ch'l al mét in guàrdia da Damien dgénd che lò al sà incòsa, ch'al s catàva a Róma quànd 'l è nâ e ch'l à vdû anc la màdar, na siacàla a dir dabòṅ. Thorn 'l al fà paràr via da na guàrdia.

Turnâ a cà, al tōś a lauràr sèg la badànda nóva ad sò fiōl, la sgnóra Baylock (Mia Farrow). Chi lē c'n al tèmp la sa ślarga tulénd dal deciśiòṅ par sò cònt cuma qvéla ad tōr in cà un rottweiler par diféndar Damien. In cal méntar un futògraf, Keith Jennings (David Thewlis), guardànd dal parsòni ch'l iva tòlt śò, al véd in dal foto di quèi strân cuma s'i fùsan di preśàgi ad mòrt. Anc pàdar Brennan al gh 'n à òṅ, un lavōr ch'a pâr un spróc. Al religiōś al próa incóra a mét'r in guàrdia Thorn, dgénd-ag che Damien 'l è 'l Anticrìst incarnâ e ch'a gh'è da cupàr-'l a tut i cóst. Sōl 'n óm ciamâ Bugenhagen (Michael Gambon) 'l al pōl jutàr a far-al ma a ghè 'd andàr a Megiddo in Iśraēl parchè chi lò al s cata là. Thorn al s in và arliâ e, durànt na timpèsta, al prēt al pèrd la vita, insfilsâ da 'n parasìlti ch'al s éra dasćiuldâ da 'l campanìl dna céśa.

La Katherine la n gh'à piò al mestruasiòṅ: la gh'à incóra 'd avér fiōl ma 'sta vòlta la n al vōl briśa parchè la gh'à paùra ch'al sia cuma Damien.

Culegamènt estéran