Nicolás Almagro

Da Wikipedia.
C'l artìcul chè 'l è scrit in Miranduléś Emiliàn
Nicolás Almagro tòlt śò in dal 2012
Al spagnōl méntar 'l è drē a schisàr


Nicolás Almagro Sánchez Rolle (Mùrsia, 21 'd Agóst dal 1985, a s lèś [nikoˈlas alˈmaɣɾo ˈsantʃeθ] in Spagnōl), cgnusû anc sōl cuma Nico, 'l è 'n tenìsta spagnōl prufesiunìsta da 'l 2003 ch'l è stâ al nùmar nóṿ dal mónd al 2 ad Maǵ dal 2011.

'L è élt 183 cm e al péśa 81 chilo. Al sò alenadōr 'l è Samuel Lopez.

Al cólp ch'a gh piàś da piò 'l è al drit anc s'al gh'à 'n arvèrs che lò al śōga a na maṅ sōla dimóndi bèl a véd'r-as, specialmènt al sò topspin. La superfìsi in dua al s cata méj l'è la tèra batùda.

Al dascór anc in Itagliàn e 'n pôc in Ingléś e al dróa al bras déstar. Al tîṅ par la squàdra ad balòṅ dla sò sità, al Real Murcia, e anc p'r al Real Madrid.

In dla sò caréra 'l à śugâ daśnóṿ finàli ad turnèo d'l ATP (tuti in sla tèra), vinsénd-an dódas, la prima a Valénsia al 16 'd Avrìl dal 2006 (cónt'r al francéś Gilles Simon batû par 6–2 6–3) dòp èsar pasâ p'r al qualificasiòṅ e avér fat fóra via via di ex nùmar òṅ dal mónd cuma Juan Carlos Ferrero e al rus Marat Safin. Fra i sò tìtui, a gh 'n è anc dū d'l ATP 500, sèmp'r a Acapûlc: qvél dal 2008, vins cóntar 'l argintèṅ David Nalbandian par 6–1 7–6, e qvél dal 2009, in finàl cóntar Gaël Monfils par 6–4 6–4.

In di Gran Slam 'l è stâ bòṅ ad rivàr par tri vòlti in di quàrt dal Roland Garros (in dal 2008 baténd Andy Murray in di utàṿ e pò anc in dal 2010 e in dal 2012) ma 'l à pò sèmpar pèrs da 'l majurchèṅ Rafael Nadal e anc par na vòlta in di quàrt di Australian Open ('l è sucès in dal 2013) batû da David Ferrer dòp èsar stâ avànti ad dū sét.

Culegamènt estéran