Mario Balotelli

Da Wikipedia.
C'l artìcul chè 'l è scrit in Miranduléś Emiliàn
Balotelli tòlt śò in dal 2012 còntar l'Inghiltèra
Mario cun la maja dl'Inter


Mario Balotelli, (Palèrum, 12 'd Agóst dal 1990) 'l è 'n śugadór ad balòṅ itagliàṅ, nâ da di genitōr ganéś, i Barwuah. Al śóga da atacànt a 'l èstar, cun la squàdra ingléśa dal Manchester City. Al sò scutmàj 'l è Super Mario.

Biugrafìa

Nâ in Sicìglia, da pìcul al s trasferìs in dal cumùn bresàṅ ad Bagnōl Mèlla e al s pòrta a drē di distùrub a 'l budèli p'r i quài 'l è custrèt a far-'s uperàr. A dū an al ròbi i vaṅ méj ma 'l an dòp, anc su cunsìli di servìsi suciài parchè i sò genitōr i ér'n in buléta sparàda, al vèṅ dâ in afidamènt da 'l tribunàl di minōr a la famìjà Balotelli ad Cunséś. Mario al n à mai pardunâ i sò genitōr naturài ad cal fat lè, rinfaciànd-ag 'd ès'r-as sèmp'r in fargâ 'd lò.

A 18 an Mario al tōś la sitadinànsa itagliàna. In dal Luj dal 2012 la mudèla Raffaella Fico la fà savér ch'la gh'à 'd avér un fiōl da lò.

Caréra

Mario al taca a śugàr a balòṅ a sinc an in d'l uratòri ad Mumpiàṅ (un quartêr ad Brësa). In dal 2001 al pasa fra i śóvan dal Lumezzane par pò far al sò debùt fra i prufesiunìsta a séd'ś an in dla partìda ad C1 cónt'r al Padva. Al 31 'd Agóst dal 2006 al vèṅ cumprâ da 'l Inter. Cun i Milanéś ad Roberto Mancini al taca a śugàr in Serie A in dal Dicémbar dal 2007 cónt'r al Cagliari. Cun i lumbàrd al gh rèsta in fiṅ a 'l Istâ dal 2010, vinsénd 3 scudét e na Champions League sgnand in tut 20 gòi in campiunâ e 8 in dal cópi, par pò pasàr a 'l Manchester City in dua al vins al scudét dal 2011-2012.

Cun la nasiunàl al fà al sò debùt al 10 'd Agóst dal 2010 cóntar la Còsta 'd Avòri a Lóndra. Al séggna al sò prim gòl cun l'Itâglia 'l 11 ad Nuvémbar dal 2011 in Pulògna. A 'l Europeo dal 2012 al riva secónd da drē da la Spaggna pardénd la finàl par 4-0.

Culegamènt estéran