Mara Carfagna

Da Wikipedia.
C'l artìcul chè 'l è scrit in Miranduléś Emiliàn


Maria Rosaria Carfagna dita Mara l'è na pulìtica itagliàna, nada a Saléran al 18 ad Dicémbar dal 1975. In dal pasâ l'à fat anc la balarìna, la mudèla e la show-girl in televiśiòṅ prima ad dvintàr minìstar di Ucaśiòṅ pâra par tut in dal Guéran Berlusconi IV, in càrag da 'l 8 ad Maǵ dal 2008.

Biugrafìa

Mara Carfagna tòlta śò 'l 8 ad Mars dal 2010 a 'l Quirinàl

Furmasiòṅ

Dòp avér tòlt i diplòma sintìfic e ad bal in dla scóla dal San Carlo ad Nâpol, Mara Carfagna la cuntìnua la sò furmasiòṅ ad balerìna a New York, la stùddia recitasiòṅ e p'r òt an la s impratichìs a 'l pianofòrt in cunservatòri.

In dal 1997 la và a Säls a Miss Italia rivànd sèsta e vinsénd al tìtul ad Miss Cinema.

In dal 2001 la tóś la laùrea in Giurisprudènsa a l'Università ad Saléran cun 110 e lòd, dascurénd na téśi in Dirit dl'infurmasiòṅ e sistéma raddioteleviśìṿ.

Lavór ad mudéla, balarìna e valéta

La taca a lauràr in televiśiòṅ in dal 2000 su Rete 4 in di prugràma ad Davide Mengacci La domenica del villaggio e la gh stà in fiṅ al 2006 quànd la pasa a Rai 2 a dar na maṅ a Giancarlo Magalli e la sò Piazza grande.

Mara la fà pò anc part dal traśmisiòṅ I cervelloni, Vota la voce e Domenica In.

In dal 2005 Mara Carfagna la s cava śò p'r un calendàri ad Max in du la s véd dimóndi daśvastìda.

In dal Śnar dal 2007, durànt la traśmisiòṅ di Telegat, Silvio Berlusconi al gh fà di cumplimènt esplìcit: «S'a n fus minga spuśâ a ta spuśarév subìt!». «Mè a 'ndrév dapartùt vòsc!» l'è stada la rispòsta ad la Carfagna. Veronica Lario, mujér ad Silvio, la s in tóś a mal parchè lì lò al gh'iva mancâ ad rispèt e la manda na létra al giurnàl la Repubblica par dmandàr a sò marè ad scuśàr-as sèg in pùblic. 'L epiśòdi 'l à fat scalpór in tut i giurnài dal mónd.

La pulìtica

La Carfagna la gh à al mistér ad respunsabìla dal muvimènt dal dóni ad Forsa Itàglia (in séguit Pòpul dla libertà).

In di elesiòṅ pulìtichi dal 2006 la và in Parlamènt in dla Cambra di Deputâ, ròba ch'la fà incóra anc du an dòp dvintànd minìstar di Ucaśiòṅ pâra par tut.

La s preśénta anc a gl'elesiòṅ regiunàli dla Campàgna e la fà sù un muć ad preferénsi: cun 55.695 vōt l'è al cunsiliér più vutâ ad tut i tèmp. La decìd però ad restàr in Parlamènt.

Al 19 ad Nuvémbar dal 2010 la diś a tut ch'la gh'à intensiòṅ ad dimet'r-as da minìstar e da deputàda dla Repubblica e ad mulàr anc al PDL par di cuntrast su la gestiòṅ dal rusc in dla sò regiòṅ ma pò la tórna indrē sinc dè dòp.

Sèmpar in dal Nuvémbar dal 2010 la s litga cun la sò culéga ad partî Alessandra Mussolini, anvóda dal Duce, dand-ag dla Vajassa (che in campàṅ a vul dir Dunàsa petégla e sarvidóra) parchè la l'iva tòlta śò cun al telefunèṅ mèntar la discuréva cun Italo Bocchino, un pulìtic ad Futuro e Libertà arvèrs a Silvio Berlusconi. La Mussolini la gh rispónd “A t dag adòs e i tò òć śgranâ i saràṅ incóra più vèrt”.

Culegamènt estéran