Macabro (film 1980)

Da Wikipedia.

C'l artìcul chè 'l è scrit in Miranduléś Emiliàn

Macabro

Stanko Molnar e la Stegers in na figùra dal film
Scarésa
1980
Regìa: Lamberto Bava
Scritōr: Antonio AvatiPupi Avati
Lamberto BavaRoberto Gandus
Atōr: Bernice StegersElisa Kadigia Bove
Stanko MolnarVeronica ZinnyRoberto Posse
Fernando PannulloFerdinando Orlandi
Müsica: Ubaldo Continiello
Léngua: ItagliàṅIngléś
Dürä dal film: 89 minüt
Nasiōṅ: Itàglia


«
Al film ch'l à fat paùra anc a Dario Argento.»
(Tagline dal film)


Macabro (Scarésa) 'l è 'n film ad scarésa dal 1980 ad Lamberto Bava scrit insém a Pupi e a Antonio Avati ch'al 'l à anc prudót insém a Gianni Minervini.

Sunt

La Jane Baker (Bernice Stegers) la stà a New Orleans insém a sò marè Leslie (Fernando Pannullo) e a i sò dū fiōi, un masćèṅ e na putìna più granda, la Lucy (Veronica Zinny). Rivàda a na sèrta età, la sgnóra la mét dal pēvar in dla sò vita faghénd-as 'n amànt in Fred Kellerman (Roberto Posse). La 'l véd ad nascòst in na cambra tòlta in afìt in dla cà 'd un śóvan òrub, Robert Duval (Stanko Molnar) ch'al gh viṿ insém a la sò vècia màdar (Elisa Kadigia Bove).

La Lucy, ch'l'è furba stramaladìda, par vindicàr-as ad cla malnéta ad sò màdar, un dè la fóga sò fradèl in dla vasca da bagn e pò la ciàma sò màdar dgénd-ag ch'l'è sucèsa na daśgràsia. La dóna, daspràda, la tōś la màchina par turnàr a cà in présia insém a Fred ma lung la strada la gh'à 'n incidènt. Lē la n s fà gnint ma 'l óm al mōr in sal cōlp parchè al laméri i gh tàjan la tèsta. La Jane la pasa soquànt tèmp in manicòmi par pò turnàr a cà da sò fiōla. In cal méntar però sò marè al s 'n è andâ parchè al patìva tròp.

La sgnóra Baker la và a star a cà ad Robert. Ad sira lē la s mét la camìśa da nòt e la s fà bèla ma minga par Robert, ch'in cal méntar al s è inamurâ ad lē. Chi lò al sènt di stus vgnir da 'd sōvar cuma se lē la faghìs 'l amōr ma a n capìs minga cuma a pōl èsar parchè ninsòṅ 'l è vgnû dèntar.

Na sira a cà sua a riva la Lucy par séna. Chi lē la n à mai pardunâ sò màdar p'r i còran ch'l'iva fat a sò pàdar e anc adès la stà mâl vdénd-al dimóndi śò. Mèntar la Jane l'è vultàda da cl'atra banda, lì lē la buta in dla mnèstra 'n uréć ad Fred par far-'g-al magnàr e pò la gh cònta ch'l'è stada lē a cupàr sò fradèl.

Culegamènt estéran