Luca Barbareschi

Da Wikipedia.

C'l artìcul chè 'l è scrit in Miranduléś Emiliàn


«
Al pòst ad Berlusconi mè a gh'arév vargóggna. S'a fus al sò pòst, par lò, par la sò famìja, p'r i sò fiói, mè a 'ndarév via dal Paéś.»
(Dichiarasiòṅ ad Luca Barbareschi dal 9 ad Dicémbar dal 2010[1])


Luca Barbareschi

Luca Giorgio Barbareschi (Muntvidèo, 28 ad Luj dal 1956) 'l è 'n atór, regìsta, imprendidōr, preśentadōr televiśìṿ e pulìtic itagliàṅ. 'L à fat al trasfurmìsta, un film dal 2002.

Biugrafìa

I afàr

Fundadōr ad sucietà in dal camp dl'infurmàtica Glamm Interactive e Video Online, al fà na cà ad prudusiòṅ p'r al cìnema e la televiśiòṅ, la Casanova Multimedia. Zodiaco, Una Musica Silenziosa e Le Ragazze dello Swing i èṅ i prudót gnû fóra in dal córs dal tèmp.

Barbareschi al dà vita anc a n'atra cà ad prudusiòṅ, stablìda a Los Angeles, la Four Point Entertainment ch'la fà sù in di an Nuànta sènt-déś puntàdi dal spetàcul That's amore. La fà anc di lavór par la Fox e la Think Entertainment ingléśa.

Prima di elesiòṅ pulìtichi dal 2008 'l iva dit che, s'al fus stâ elèt, 'l arév dâ al pusès dla sò aśiénda a un blind trust, p'r al cunflìt 'd interès[2]. Finìdi gl'elesiòṅ, e dòp èsar stâ elèt, 'l à pò dit ch'al 'l à fat[3].

Però a gh'è quél ch'a traśa parchè pò al diś ch'al gh tîṅ a drē in n'intervìsta data a Alessandro Ferrucci p'r al giurnàl Il Fatto Quotidiano dal 31 'd Utóbar dal 2009: «La paga da deputâ? La n è mia a basta, a m tóca lauràr. A-j-ò anc n'atività da mandàr avànti [...] e a sòṅ dimóndi brav. A m basta n'óra par dar tuti al dispuśisiòṅ ch'a gh vól e par far-i far.»[4]

I film

Luca Barbareschi insém a Ezio Greggio

Barbareschi al fà al sò debùt in dal cìnema in dal 1979 in dal film Da Corleone a Brooklyn 'd Umberto Lenzi cun Mario Merola ambintâ a Palèrum. 'L an dòp 'l è al tùran ad Cannibal Holocaust ad Ruggero Deodato un film crud e malsàṅ fat in mèś a di salvàdag dl'Amasònia in dua al gira dal parti nûd e al masa dabòṅ e mia da burla un pòvar ninèṅ cun un sćiòp.

In dal 1983 al vèṅ sarnî insém a Gabriel Byrne p'r al film Hanna K. ad Costantin Costa-Gavras. In dal stés an Gabriele Salvatores al gh dà la part ad Lisàndar in Sogno di una notte d'estate cun Erika Blanc e Claudio Bisio. In dal 1984 al lavóra cun Pupi Avati e al sò Impiegati mèntar in dal 1986 al fà al fnòć in dal film Via Montenapoleone ad Carlo Vanzina.

In dal 1987 'l è a fiànc dla camiunìsta Serena Grandi in Teresa dirèt par Dino Risi. Al al dirìǵ anc Luigi Magni in dla pelìcula In nome del popolo sovrano in du a gh'è anc Nino Manfredi.

A la fiṅ di an Nuànta al taca anc a giràr di film par cònt suo: Ardena dal 1997 e Il trasformista dal 2002. Quést chè 'l è na pelìcula ch'la dascór 'd un pulìtic ch'al riva a Róma e al taca a rubàr e a far al trasfurmìsta, daśmingand-as i mutìṿ vér p'r i quai al s éra dedicâ a la pulìtica a 'l inìsi.

Dal punt ad vista cumerciàl al film 'l è un diśàstar: in dal sali 'l à fat sù sól 69.473 euro mèntar la prima viśiòṅ televiśìva dal 7 ad Favràr dal 2011 (in sla Rai 3) la cata sù sól 858.000 spetadōr e al 2,96% ad share[5].

In dal 2010 al gh'à na part in dal film Noi credevamo ad Mario Martone ch'al dascór dal risurgimènt itagliàṅ. 'L è stâ preśentâ in cuncórs al Festival ad Venèsia.

Al traśmisiòṅ televiśìvi

In dla sò caréra 'l à laurâ dimóndi vòlti p'r la televiśiòṅ. In dla stagiòṅ 1984/1985 'l à fat part dal cast dal spetàcul ad Rete 4 Quo vadiz? ad Maurizio Nichetti insém a Umberto Smaila, Franco Oppini e Angela Finocchiaro. Al bòt però al al fà cun la traśmisiòṅ C'eravamo tanto amati in dua marè e mujér i ś dàvan adòs litgànd e dgénd-as ad tut i culór 'l òṅ cun cl'atra, giusà pò s i 'l fàvan dabòṅ[6].

Dòp na pàuśa, al tórna al sucès cun Il grande bluff, na traśmisiòṅ in du al tulìva in gir i persunàǵ dla televiśiòṅ faghénd finta 'd èsar 'n àtar par via dal truc ch'al gh'iva adòs e pò tirànd-as via la mascra a la fiṅ faghénd védar chi 'l éra dabòṅ. D'arcurdàr séns àtar la sò eśibisiòṅ da cuncurènt tuscàṅ, malnét e pastisòṅ a la Ruota della fortuna in du 'l à tòlt in gir un Mike Bongiorno incasâ négar, cun n'Antonella Elia ch'la s pisàva adòs dal rìdar[7].

Al sò ùltim prugràma par la televiśiòṅ 'l è Barbareschi Sciock ad La7 dal 2010, na traśmisiòṅ ch'l'à fat sù dimóndi discusiòṅ parchè al cundutór 'l è stâ tòlt in castàggna a cupiàr dal batùdi dal blog "Spinoza" sénsa dir ad chi éran e sénsa pagàr-an i dirìt[8].

Pulìtica

Durànt la sò caréra in dal mónd dal spetàcul, al s batéśa cuma 'n sucialìsta[9] ma pò al fà védar 'd avér di idéi e di cumpurtamènt davśèṅ a quéi ad dèstra[10].

Barbareschi 'l è un persunàǵ che da spés al và còntra la curènt cuma quand, in dal 2002, 'l à criticâ la prupòsta ad léǵ su i finansiamènt al cìnema dla sò culéga Gabriella Carlucci, suréla ad Milly e dóna ad Fòrsa Itàglia, al partî ad Silvio Berlusconi. Luca 'l iva dit ciàr e tónd che la cumisiòṅ ministeriàla 'l éra bòna da gnint parchè, par far na próva, lò al gh'iva mandâ, lugànd al sò nóm, un tèst scrit p'r al cìnema 'd Orson Welles e lì lór i gh'ivan dit ch'al n éra minga a l'altésa[11].

A gl'elesiòṅ pulìtichi dal 2008 al vèṅ candidâ in dla circuscrisiòṅ dla Sardéggna p'r al Pòpul dla Libertà e al vèṅ elèt deputâ dal Parlamènt itagliàṅ dvintànd vicepresidènt dla cumisiòṅ Traspòrt, Pòsti e Telecumunicasiòṅ.

Al 4 ad Maǵ dal 2008 al diś a la televiśiòṅ che lò 'l è 'd acòrd cun al fat che i fnòć i s pòsan spuśar-as fra 'd lór e anc adutàr di fiói. Al dè dòp al sò partî al gh tira gl'urèci dgénd che chi lavór lè i n èṅ minga in dal prugràma dal guèran[12].

In dal Nuvémbar 2009 'l iva muciâ sù sól al 46,7% ad preśénsi in Parlamènt[13].

In dal Luj dal 2010 al lasa al grup dal Pòpul dla Libertà p'r andàr insém al Presidènt dla Cambra Gianfranco Fini ch'l iva dat vita in cal mèntar a 'l muvimènt Futùr e Libertà.

Al 20 ad Favràr dal 2011, na stmana dòp ch'al s éra tgnû al prim cungrès ad Futur e Libertà e un pēś scambi ad batùdi cun Fini ch'al gh'iva dit «Cuma a t iva dit da par nuàtar, a t al dig incóra in pùblic: a gh'è di atór e di pajàs. I pajàs i n fan minga sèmpar rìdar, dal vòlti i fan anc piànśar»[14], al lasa la nóva furmasiòṅ pulìtica p'r andàr in dal grup misć[15].

Filmugrafìa

Cìnema

Film par la Televiśiòṅ

Televiśiòṅ

Culegamènt estéran

Nòti

  1. Il Cavaliere? E' un genio. Anzi, se ne vada Ilgiornale.it, 10 ad Dicémbar dal 2010
  2. RAI e Mediaset si mettano assieme iltempo.it, 31 ad Mars dal 2008
  3. Silvio faccia come vuole, ma io ho scelto il blind trust repubblica.it, 28 'd Avrìl dal 2008
  4. Il Fatto Quotidiano, 31 'd Utóbar dal 2009, paǵna 4
  5. Barbareschi fa flop su Rai Tre ilfattoquotidiano.it, 9 ad Favràr dal 2011
  6. Amarcord: C'eravamo tanto amati davidemaggio.it, 21 ad Setémbar dal 2007
  7. Mike non accetta e nasconde la beffa di Barbareschi corriere.it, 4 ad Maǵ dal 1996
  8. Barbareschi sotto accusa in Rete: «Copia le battute dal blog Spinoza» corriere.it, 25 ad Śnar dal 2010
  9. Sono un socialista a vita ma la sinistra è troppo snob corriere.it, 24 ad Setémbar dal 2005
  10. Barbareschi insulta tutti corriere.it, 6 ad Dicémbar dal 1995
  11. Legge sul cinema, si cambia corriere.it, 30 ad Luj dal 2002
  12. Barbareschi: sì a nozze e adozioni gay. Il Pdl: non se ne parla, corriere.it, 6 ad Maǵ dal 2008
  13. Se a Barbareschi non basta lo stipendio, corriere.it, 4 ad Nuvémbar dal 2009
  14. Fini-Barbareschi, lite con lancio di penne corriere.it, 5 ad Favràr dal 2011
  15. Anche Barbareschi lascia Futuro e Libertà adnkronos.com, 20 ad Favràr dal 2011