Liliana Cavani

Da Wikipedia.
C'l artìcul chè 'l è scrit in Miranduléś Emiliàn


Liliana Cavani l'è na regìsta itagliàna nada a Carp in Pruvîncia ed Mòdna al 12 ad Śnar dal 1933.

Biugrafìa

Liliana Cavani mémbra dla giurìa dal fèstival ad Venesia dal 2009 (l'è quéla cun i uciài adòs a la maja rósa) cun i sò cumpàgn, da sinìstra: Anurag Kashyap, Sandrine Bonnaire, Joe Dante, Ang Lee, Sergei Bodrov e Luciano Ligabue

Liliana Cavani la nas a Carp (Mòdna), fióla 'd un architét mantṿàṅ e dna màdar cun la pasiòṅ dal cìnema. 'L è acsè ch'la ciapa sù 'n interés p'r i film.

Da granda la tóś na làurea in Létri Antìghi a Bulògna in dal 1959 e pò al diplòma al Séntar Sperimentàl dal cìnema vinsénd al ciak 'd òr cun al curtumetràǵ La battaglia (La batàja).

La taca acsè a far di ducumentàri e di servìsi par la RAI ch'i dascóran dal sociàl e dla pulìtica: La Storia del Terzo Reich (La stòria dal Tèrs Reich), La donna nella resistenza (La dóna in dla reśisténsa), La casa in Italia (La cà in Itàglia) e via dascurénd.

In dal 1966 cun Francesco d'Assisi la gira al sò prim film, prudót par la RAI cun Lou Castel ch'al fà la part dal Sant.

In dal 1968 la firma al nóṿ film Galileo (in cuncórs al Festival ad Venèsia) in du la mét a fóg al cunflìt fra sènsa e religiòṅ.

In dal 1969 la gira I cannibali (I canìbai) ispirâ a 'l Antigone ad Sofocle.

In dal 1971 la Cavani la preśénta a Venèsia (fóra dal cuncórs) al film L'ospite ch'al cònta al vicéndi dna dóna 'd un manicòmi lager ch'la próa a turnàr incóra in dal mónd di saṅ.

In dal 1973 la cgnós al sucès internasiunàl cun la pelìcula Il portiere di notte (Al purtér ad nòt) cun Dirk Bogarde e Charlotte Rampling. In dal film, tréd'ś an dòp la sécunda guèra mundiàla, i s càtan na dóna scampàda al camp ad cuncentramènt naśìsta e al sò agusèṅ ch'al fà, in cal mèntar, al purtér ad nòt.

In dal 1981 la gira La pelle (La pèl), un film ambintâ in dal 1944 a Nâpol durànt la guèra, cun dal vicéndi da patimènt cuma quéli di parśunér tedésc vindû a péś 'd òr, putèṅ dâ a di suldâ maruchèṅ e l'erusiòṅ dal Veśùvi. I atór principài i èṅ Marcello Mastroianni, Claudia Cardinale, Burt Lancaster e Ken Marshall.

Cun Oltre la porta (da 'd là da 'l us) dal 1982 la Cavani la gh'à al sòlit cast all-stars ma fat sōl da di atór europei.

Al minga ciàri perversiòṅ sesuàli 'd Interno berlinese (Intéran berlinéś) i n càtan briśa i favór dla crìtica e gnanc Francesco, ch'al cònta la vita ad Sant Fransésc cun Mickey Rourke, al gh'à al sucès sperâ.

Cun Il gioco di Ripley (Al śóg ad Ripley) dal 2002, film cun John Malkovich trat da un rumànś ad Patricia Highsmith, la regista la tórna ad avér di riscòntar puśitiṿ, anc a 'l èstar.

In dal 2004 la gira la fiction par la televiśiòṅ De Gasperi l'uomo della speranza, cun Fabrizio Gifuni.

Filmugrafìa

  • 1966 Francesco d'Assisi
  • 1968 Galileo
  • 1969 I cannibali
  • 1971 L'ospite
  • 1973 Milarepa
  • 1974 Il portiere di notte
  • 1977 Al di là del bene e del male
  • 1981 La pelle
  • 1982 Oltre la porta
  • 1985 Interno berlinese (The Berlin Affair)
  • 1989 Francesco
  • 1990 La traviata (TV)
  • 1993 Dove siete? Io sono qui
  • 1996 Cavalleria rusticana (TV)
  • 1998 Manon Lescaut (TV)
  • 2002 Il gioco di Ripley (Ripley's Game)
  • 2005 De Gasperi, l'uomo della speranza (TV)
  • 2008 Einstein (TV)
  • 2008 Mammt