Le foto di Gioia
| C'l artìcul chè 'l è scrit in Miranduléś |  |
| Le foto di Gioia | ||
 Di aśióli rabìdi i pùnśan a mòrt la Sabrina Salerno |
||
| Al fòto ad Giòja 1987 |
||
|---|---|---|
| Regia: Laberto Bava | ||
| Scritùr: Luciano Martino • Lamberto Bava • Gianfranco Clerici Daniele Stroppa |
||
| Atùr: Serena Grandi • Vanni Corbellini • Daria Nicolodi George Eastman • Capucine • Sabrina Salerno • David Brandon Katrine Michelsen • Marcia Sedoc • Karl Zinny • Lino Salemme |
||
| Müsica: Simon Boswell | ||
| Dürä dal film: 105 minüt | ||
| Lengua: Itagliàn | ||
Le foto di Gioia (Al fòto ad Giòja) 'l è 'n film ad scarésa dal 1987 ad Laberto Bava ricitâ da dū di sex symbol di an Utànta cuma la Serena Grandi e la Sabrina Salerno.
Sunt
La Gioia (Serena Grandi), na védva cun un pasâ da mudèla, la pòrta avànti cun sucès la rivìsta spurcacióna p'r i óm „Pussycat“ cun 'l ajùt dla sò amìga Evelyn (Daria Nicolodi). Al vénditi i èṅ dimóndi élti e la lèśbica Flora (Capucine), ch'la gh fà cuncurénsa, la s rōd al fégat. Da spés Gioia la ciàma a cà sua dal mudèli par far di servìsi futugràfic malnét ma la gh'à un vśèṅ śóvan dimóndi curióś e paraliśâ dòp 'n incidènt, Mark (Karl Zinny), ardùt a vìvar in sna scrana a rudèli, ch'al la tîṅ 'd òć ad nascòst cun un canuciàl.
Na sira la Kim (Katrine Michelsen), na mudèla dla rivìsta, la vèṅ insfilsàda da 'n furcàr e pò purtàda via in un studi in dua 'l asasèṅ al gh fà dal fòto cun da drē un pòster gigànt dla Gioia. Al dè dòp chi lē la cata in dla sò pòsta na létra cun dèntar cal fòto lè. 'L è un brut cólp par la rivìsta ma un servìsi cun la Sabrina (Sabrina Salerno) cavàda śò in cupertìna la cùcia incóra in élt al vénditi. Al fradèl ad Gioia, Tony (Vanni Corbellini), al gh la cava a purtàr-'s a lèt ma a n è briśa bòṅ ad gusàr-'s-la parchè imputènt. A và pèś però a la Sabrina ch'la vèṅ saràda dènt'r a la sò cà cun dal parfùm adòs e lasàda murìr sóta i cólp di bśi dal vrèspi mulàdi lè da 'l manìac.
Quànd la Gioia la ricév al fòto dal sò cadàvar la và fóra ad tèsta, la pénsa ad véndar la rivìsta e la s buta sót i bras dal sò vèć amànt Alex (George Eastman), turnâ in sità da pôc tèmp.
La pulisìa, cun 'l ispetōr Corsi (Lino Salemme), la n sà minga catàr al culpévul, dand anc la cólpa a 'l pòvar fnòć Roberto (David Brandon), culéga ad Gioia, che, par scapàr via da lōr, al finìs sóta na màchina pardénd acsè la vita.
Invéci 'l asasèṅ 'l è decìś a srar i cònt cun la Gioia, andànd in dla sò vila, e lè al masa l’Evelyn.
