Larry Flynt - Oltre lo scandalo

Da Wikipedia.

C'l artìcul chè 'l è scrit in Miranduléś Emiliàn

The People vs. Larry Flynt
Larry Flynt - Oltre lo scandalo

Harrelson e la Courtney Love in na figùra dal film
Larry Flynt - Ólt'r al scàndal
1996
Regìa: Miloš Forman
Scritōr: Scott Alexander • Larry Karaszewski
Atōr: Woody HarrelsonCourtney Love
Edward NortonBrett HarrelsonMiles Chapin
Donna HanoverJames CromwellJan Tríska
Crispin GloverVincent SchiavelliRichard Paul
Norm MacdonaldJan TrískaRainbeau Mars
Müsica: Thomas Newman
Léngua: Ingléś
Dürä dal film: 129 minüt
Nasiōṅ: Stat Unî


«
Qvél ch'al fà a pōl anc a n piaśēr-uv minga, ma v la sintî'v ad pruibìr-'g al dirìt ad far-al?»
(Tagline dal film)


Larry Flynt - Oltre lo scandalo (Larry Flynt - Ólt'r al scàndal) 'l è 'n film biugràfic dal 1996 ad Miloš Forman ch'al cònta la vita d'l editōr americàṅ ad rivìsti pòran Larry Flynt ch'l è stâ mandâ a prucès dimóndi vòlti par purcarìi (al tìtul uriginàł difàti al fà “La Gint cóntar Larry Flynt”) e ch'l à anc patî 'n atintâ ch'al 'l à ardùt a vìv'r in sna scrana a rudèli par sèmpar.

La pelìcula, prudóta p'r Oliver Stone e candidàda a i Prèmi Òscar dal 1997 par la regìa e par 'l atōr prutagunìsta, l'è custàda trénta-sinc migliòṅ ad dòlar a 'l incìrca ma la 'n à purtâ a cà sōl vint.

Sunt

In di Stat Unî di an Stanta 'l uriginàł e cónt'r a 'l règhli imprendidōr Larry Flynt (Woody Harrelson), dòp avér tribulâ par soquànt an e cun 'l ajùt dla sò quàrta mujér, l’Althea Leasure (Courtney Love), e ad sò fradèl Jimmy (Brett Harrelson), al fà catàr in di paltèṅ dal paéś na rivìsta pòran nóva 'd paca par chi óm ch'la s ciàma “Hustler”. I puritàṅ e i dasćiòlda-crist americàṅ i tàcan na cruśàda cónt'r ad lò, miténd in pē prucès su prucès. Larry al s difénd sèmpar tgnénd a mènt a 'l Prim Emendamènt dla custitusiòṅ ch'la fisa la libertà ad religiòṅ, paròla e stampa. A gh dà na maṅ 'l avucàt Alan Isaacman (Edward Norton).

Larry al fà sù i bèsi e al s dà a na vita ad sès e dròghi ma pò al finìs in parśòṅ in dua al vèṅ cunvertî a 'l cult di Cristiàṅ Evangèlic ad òpra dla surèla dal presidènt Jimmy Carter, la Ruth (Donna Hanover), anc se però la rivìsta la cuntìnua a vgnir fóra listés. Un dè un mémbar dal grup White Supremacy, Joseph Paul Franklin (Jan Tríska), al gh tira dal sćiuptàdi parchè 'l éra armàś uféś vdénd dal fòto malnéti ad sès fra biànc e négar.

Culegamènt estéran