La casa che grondava sangue

Da Wikipedia.

C'l artìcul chè 'l è scrit in Miranduléś Emiliàn

The House That Dripped Blood
La casa che grondava sangue

L'Ingrid Pitt la tira 'n buchèṅ in na figùra dal film
La cà ch'la śbavśàva sangṿ
1970
Regìa: Peter Duffell
Scritōr: Robert Bloch • Russ Jones
Atōr: Christopher LeeTom AdamsIngrid Pitt
Peter CushingDenholm ElliotJon Pertwee
Nyree Dawn PorterWolfe MorrisJoss Ackland
Robert LangChloe FranksJohn Bennett
Geoffrey BayldonJoanna DunhamRoy Beck
Müsica: Michael Dress
Léngua: Ingléś
Dürä dal film: 97 minüt
Nasiōṅ: Régn Unî


«
Al terōr al v aspèta in tut al cambri dla cà ch'la śbavśàva sangṿ.»
(Tagline dal film)


La casa che grondava sangue (La cà ch'la śbavśàva sangṿ) 'l è 'n film ad scarésa britànic dal 1970 ad Peter Duffell girâ c'n un budget ad sincsènt-mila dòlar.

A 'l èstar i al cgnósan cuma “A Casa que Pingava Sangue” in Braśìl, “La mansión de los crímenes” in Spaggna, “La maison qui tue” in Frància e “Totentanz der Vampire” in Germàgna.

Sunt

A séguit dla sparisiòṅ sénsa mutìṿ 'd un vèć atōr ad film ad scarésa, Paul Henderson (Jon Pertwee), ch'l iva tòlt in afìt da 'l agìnt imubiliàr A.J. Stoker (John Bryans) 'n apartamènt, 'l ispetōr ad Scotland Yard Holloway (John Bennett) al và a védar cuś è sucès dabòṅ in cla cà là e al vèṅ a savēr di quèi da far vgnir i śgriśōr lung la schina a prupòśit dla gint ch'la gh'éra andàda a star in di an precedènt.

Epiśòdi "Method For Murder"

Un scritōr ad lìb'r ad scarésa, Charles Hillyer (Denholm Elliot), al s éra stablî là insém a sò mujér Alice (Joanna Dunham) par finìr un rumànś cun prutagunìsta un manìac invintâ da lò ciamâ Dominic. In di dè a vgnir però cal persunàǵ lè al s preśénta dabòṅ in dla sò cà ma 'l al véd sōl lò tant ch'al scritōr al créd 'd avér-ag di prubléma in tèsta e dònca al và da 'l psicòlug Andrews (Robert Lang) par far-as curàr. Quànd 'l è là, dastēś in sal litèṅ, Dominic, ch'in dla véra 'l è 'l amànt dl’Alice e 'n atōr ad quàtar sòld ciamâ Richard (Tom Adams), al i stròsa tut dū. Purtròp par l’Alice 'l óm al taca a catàr-ag gust a far al manìac.

Al manifèst itagliàṅ dla pelìcula.

Epiśòdi "Waxworks"

In séguit la cà l'éra stada tòlta par 'n agìnt ad cambi in pensiòṅ, Philip Grayson (Peter Cushing). Chi lò, cumpàgn a 'l sò amìg Neville Rogers (Joss Ackland), al gh'éra armàś dimóndi dòp avér vdû in un muśèo dal céri al grugn dna dóna dimóndi bèla che là la fava la part dla Salomè e ch'la gh arcurdàva na ragàsa ch'i dū i ìvan cgnusû da śōvan. Al pruprietàri dal muśèo (Wolfe Morris) al gh'iva cuntâ che lē l'éra sò mujér e ch'l'iva masâ 'l sò amìg più grand prima 'd èsar cupàda par la pulisìa. Par tgnir dacàt par sèmpar la sò belésa 'l óm 'l iva decìś ad far-ag na statṿa 'd céra. I dū óm però i gh butàvan tròp 'l òć adòs e c'l àtar, gelōś mat, al gh l'iva fata pagàr tgnénd anc cònt ch'in maṅ al purtàva sèmp'r un fèr da śgrar. 'D atra part, cuśa gh'iv'la sèmp'r in dal sò piàt la Salomè?

Epiśòdi "Sweets to the Sweet"

Dòp ès'r armàś véduv, John Reid (Christopher Lee) 'l iva tòlt in afìt la cà lasàda libra da Philip e l'éra andâ a star là insém a la sò putìna pìcula, la Jane (Chloe Franks), una ch'la gh'iva scarésa dal fōg e ch'la n iva mai cgnusû sò màdar mòrta in dal parturìr. Par tgnir-'g adrē 'l óm 'l iva pagâ n'insgnànta privàda, na mistra ciamàda Ann Norton (Nyree Dawn Porter). Chi lē laurànd sèg l'éra vgnuda a savēr che John 'l iva pruibî a sò fiōla ad śugàr cun chi àtar baghét e ad tgnir dal bàmbuli. Quànd lē la gh 'n iva cumpràda una, lò al l'iva butàda subìt in dal camèṅ par bruśàr-la. In séguit la putìna l'iva tacâ a lèśar par sò cònt di lìb'r ad striarìa e pò l'iva purtâ via dal candéli par far-ag na bàmbula vudù par cupàr sò pàd'r esénd lē na stria cuma sò màdar.

Epiśòdi "The Cloak"

P'r ùltim 'l agìnt Stoker al cònta a 'l ispetōr cuś è sucès a Paul Henderson, 'n óm in là c'n i an ch'al s éra cumpagnâ cun na dóna dimóndi più śōvna c'n al visi dal fum, la Carla Lynde (Ingrid Pitt). Lò 'l iva tòlt in afìt la cà parchè la n éra minga tant luntàna da i teàt'r ad pòśa in dua al gh'iva da recitàr la part 'd un vampîr in òṅ di sò film ad scarésa, al tèrs insém a lē. Durànt al próvi però a n gh andàva bèṅ gnint, specialmènt i custùm i gh fàvan vgnir al lat a i śnòć da 'l tant ch'i éran lòfi. Par sò furtùna 'l iva catâ qvél ch'a gh vliva in dal negòsi ad ròba vècia ad Theo von Hartmann (Geoffrey Bayldon), un bèl tabàr antìg da métar-'s adòs, sénsa savēr che chi s al mét al dvènta pò 'n vampîr dabòṅ.

Culegamènt estéran