La bambola assassina
|
C'l artìcul chè 'l è scrit in
Miranduléś |
 Child's Play
| ||
| La bambola assassina | ||
 Alex Vincent e Chucky in na figùra dal film | ||
| La bàmbula ch'la cópa 1988 | ||
|---|---|---|
| Regìa: Tom Holland | ||
| Scritōr: Don Mancini • Tom Holland • John Lafia | ||
| Atōr: Alex Vincent • Catherine Hicks • Brad Dourif Chris Sarandon • Neil Giuntoli • Dinah Manoff Jack Colvin • Tommy Swerdlow • Alan Wilder | ||
| Müsica: Joe Renzetti | ||
| Léngua: Ingléś | ||
| Dürä dal film: 87 minüt | ||
| Nasiōṅ: Stat Unî | ||
La bambola assassina (La bàmbula ch'la cópa) 'l è 'n film ad scarésa americàṅ dal 1988 ad Tom Holland scrit insém a àtar dū mìstar dal gènar, Don Mancini e John Lafia. Custâ nóṿ migliòṅ ad dòlar, al 'n à pò purtâ a cà 44, dand vita anc a quàtar séguit: La bambola assassina 2 dal 1990, La bambola assassina 3 dal 1991, La bambola assassina 4: La sposa di Chucky dal 1998 e La bambola assassina 5: Il figlio di Chucky dal 2004. 'N àtar film 'l è drē a rivàr in dal 2013: La bambola assassina 6: Curse of Chucky.
Par far al film a gh'è stâ biśógn ad druàr déś mudèi ad bàmbuli difarénti. Gl'efèt speciài i èṅ ad Kevin Yagher.
Sunt
Al straguladōr ad Chicago, Charles Lee Ray (Brad Dourif), al gh'à i pulisiòt ad Mike Norris (Chris Sarandon) a i calcàgn. Insém a 'l sò cumpàr Eddie Caputo (Neil Giuntoli), al próa a scapàr via frî a na gamba ma 'l sò amìg al taja la còrda lasànd-al là da par lò. Dasprâ, al s lóga in un negòsi ad śugàtui ma chè Norris al gh tira un cólp ad pistòla. Prima ad murìr però Charles al gh la cava a purtàr a cumpimènt un rît vudù su 'n putòć rós ad cavî dla sèrie "Bèl Facèṅ" e al sò spìrit e la sò anma i finìsan acsè dènt'r a 'l bambulòt. Subìt dòp i partìsan dal silti ch'i dànan fōg a 'l negòsi.
Al dè dòp un putèṅ ad siē an, Andy Barclay (Alex Vincent), al dmanda a sò màdar Karen (Catherine Hicks) ad cumpràr-ag un bambulòt Bèl Facèṅ p'r al sò cumpleàn. Esénd in buléta sparàda, la dóna la 'l cómpra uśâ da 'n vagabónd e a s trata pròpria dal putòć cun dèntar Charles. Qvést chè 'l è bòṅ ad dascórar da par lò sénsa 'l pili da drē ma ninsòṅ a sà gnint. Al diś a Andy ad ciamàr-as Chucky: tut al bàmbuli Bèl Facèṅ i èṅ difàti difarénti l'una cun cl'atra.
Chucky al gh'à sōl un quèl in dla sò suca: turnàr a vìvar in un còrp da cristiàṅ arbaltànd 'l incantéśum ch'l iva fat, rubànd al còrp a qualchidòṅ àtar e al n gh'à minga di scrùpui. Cla sira lè al fà fóra la babysitter Maggie Peterson (Dinah Manoff) tirànd-ag na śmartlàda in tèsta e butànd-la śò par la fnèstra. Andy al véd incòsa ma quànd al diś a 'l detective Norris ch'l è stâ al bambulòt a masàr-la, ninsòṅ a gh créd, tut àtar, al ciàpa la cólpa lò.