L'inferno
| C'l artìcul chè 'l è scrit in Miranduléś |  |
| L'enfer | ||
| L'Inferno | ||
 François Cluzet e l'Emmanuelle Béart in na figùra dal film |
||
| 'L inféran 1994 |
||
|---|---|---|
| Regia: Claude Chabrol | ||
| Scritùr: Henri-Georges Clouzot • Claude Chabrol | ||
| Atùr: François Cluzet • Emmanuelle Béart • Nathalie Cardone Marc Lavoine • André Wilms • Thomas Chabrol • Mario David |
||
| Müsica: Matthieu Chabrol | ||
| Dürä dal film: 100 minüt | ||
| Lengua: Francéś | ||
L'Inferno (’L inféran) 'l è 'n film dramàtic dal 1994 ad Claude Chabrol, trat da na vècia scritùra dal 1964 ad Henri-Georges Clouzot che però al n à briśa psû purtàr-la a cumpimènt par di mutìṿ ad salùt.
Sunt
Paul Prieur (François Cluzet) al còmpra, faghénd di dèbit, un vèć albèrg davśèṅ a 'n lâg in dla Garòna Élta, minga luntàṅ da Tulóśa e 'l al fà dvintàr cuma nóṿ. Al sa spóśa pò cun la Nelly (Emmanuelle Béart) e al gh'à sèg un fiōl, al pìcul Vincent. Al n pōl pròpria minga lamintàr-as ad gnint parchè al gh'à un bèl lavōr ch'al fruta dimóndi, un fiōl e na mujér ch'la par na miss e ch'la gh vōl bèṅ.
Purtàr avànti 'l albèrg al dvènta però sèmpar più dûr e difìcil e al stress al custrìnś Paul a tōr dimóndi da spés dal madśìni par durmìr. Ma tōr cla ròba lè la gh fà un brut schèrs. Piàn piaṅ al taca a far-as l'idéa che sò mujér, ch'l'è gustóśa cun tut i cliènt, la gh faga i còran, specialmènt cun al mecànic Martinot (Marc Lavoine) dimóndi più śóvan ad lò.
Parchè la bèla Nelly, ch'la và in gir p'r al paéś cun cal stanèli lè che tut i la tìnan 'd òć, stà-la sèg? P'r amōr o p'r i bèsi? Cuś à'l fat lò par meritàr-as na bunàsa acsè?
Un dè a sucéd ch'al véd na prujesiòṅ ad diapuśitìvi cun lōr dū dèntar: i n àṅ fat gnint ma minga a i òć ad Paul ch'al pèrd la tèsta e al dvénta gelóś mat, al litga ad cuntìnuṿ cun sò mujér e i afàr i tàcan a 'ndàr a raméngo.
La Nelly la ciàma un dutōr che 'l al vìśita a al gh prumét ch'al dè dòp 'l al purtèra a far-as ricuveràr. Ma a gh'è incóra na nòt da pasàr insém e Paul 'l è prònt a far incòsa còntra cla "malnéta" ad sò mujér...
