Il demone sotto la pelle

Da Wikipedia.

C'l artìcul chè 'l è scrit in Miranduléś Emiliàn

Shivers
Il demone sotto la pelle

La Barbara Steele in na figùra dal film
Al dèmun sóta la pèl
1975
Regìa: David Cronenberg
Scritōr: David Cronenberg
Atōr: Barbara SteeleLynn LowryJoe Silver
Paul HamptonAllan KolmanRonald Mlodzik
Susan PetrieBarry BaldaroVlasta Vrana
Silvie DeboisCamil DucharmeWally Martin
Müsica: Fred Mollin
Léngua: IngléśFrancéś
Dürä dal film: 88 minüt
Nasiōṅ: Cànada


«
Al terōr 'l è sōl 'l inìsi»
(Tagline dal film)


Il demone sotto la pelle (Al dèmun sóta la pèl) 'l è 'n film ad scarésa dal 1975 ad David Cronenberg girâ c'n un budget ad 179.000 dòlar canadéś 'd in alóra. Al tìtul uriginàł 'l è “Shivers” ma la pelìcula l'è cgnusùda anc cuma “Orgy of the Blood Parasites”, “Frissons”, “The Parasite Murders” e “They Came from Within”.

Par cal film chè, al sò prim distribuî in gir p'r al mónd, Cronenberg 'l à vins al prèmi par la regìa a 'l Sitges Film Festival dal 1975.

Sunt

In un palàs mudèr'n ad Montréal ch'a gh'è tut, ciamâ L'Arca ad Nuè, i sucédan di fat strâṅ dòp ch'un siensiâ, Emil Hobbes (Fred Doederlin), al s éra mis a far di esperimènt par dar vita a 'n parasìta, un quèl ch'a s davśìna a na sangvétula mèś vérum e mèś lumàga, ch'al sarés bòṅ, na vòlta insfilsâ dènt'r a i còrp dal parsòni, a far-ag vgnir na śbrùśia p'r al sès, un quèl lugâ bèṅ in dal sarvèl ch'al fà fadìga a gnir fóra da par lò. La sò infarméra la 'l iva pruâ in sla sò pèl e l'éra dvintàda na malnéta ad prim órdan, tacànd-al a tut i masć ch'la s éra fata in cal méntar. Rendénd-as cònt ad qvél ch'l à fat, al śbali più grand dla sò vita, al siensiâ prima al cópa la dóna e pò al s taja la góla. Al prubléma 'l è che dòp 'n inìsi da purcùs, la gint la tōś anc la vója ad masàr.

Sōl al dutōr Roger St. Luc (Paul Hampton) e la sò jutànta Forsythe (Lynn Lowry) i próan a catàr un rimèdi ma 'l è difìcil parchè tut là dènt'r i èṅ cuntagiâ.

Prubléma

Al giurnalìsta canadéś Robert Fulford a sò tèmp 'l iva dâ adòs a 'l film in sal paǵni dla rivìsta nasiunàla Saturday Night. P'r al fat ch'la pelìcula l'iva abû di finansiamènt da 'l guèran, Fulford 'l iva intitulâ al sò artìcul „You Should Know How Bad This Movie Is, You Paid For It“ („A gh'arî pròpria da savér quànt 'l è brut cal film chè, a 'l î pagâ vuàtar!“). C'l atàc chè, dirèt e publiciśâ bèṅ, in séguit 'l à dâ dimóndi prubléma a Cronenberg par catàr sù di fónd p'r al sò òpri a vgnir. Inólt'r al regìsta 'l à anc cuntâ ch'i 'l aṅ casâ via da 'l sò apartamènt a Turònt par cal fat chè.

Culegamènt estéran