Gro grèin

Da Wikipedia.
C'l artìcul chè 'l è scrit in Carpśàn Emiliàn
Un naster ed gro grèin
Soquànt naster culurè 'd gro grèin ed diferèinti altèsi

Al gro grèin (anca dìt caneté) al s ciàma acsè dal francéś gros-grain ciuè "gràna gròsa": 'l è na versiòun ed tisû cun n' armadûra a tela in dû a s' vèd dimòndi de piò l' urdî che la trâma, e quèst perchè in dal tès'r-el, a s dròva un fîl reśistèint mo dimòndi sutîl e anca lùcid in dl' urdî, cun dimòndi densitè 'd pasàģ, ch' al va a quacèr i pasàģ méno frequèint di fîl piò gròs druê per la trâma. Cal tîp chè 'd tesidûra la rend al gro grèin lùcid da guardèr e tuchèr, mo cun 'na spéci ed rigadûra duùda a cla trâma lè 'd fîl gròs ed sòta a l' urdî lùcid; cal sistéma chè al s capìs intuitivamèint s' a s guèrda el cimōśi, vìst che pròpi lè i s vèden i fîl gròs ed la trâma ch' i fàn al gîr in dla rìga dòp, gnènd fôra da l' urdî.

Per l' urdî a s druarà un filê 'd séda, 'd rayon, u 'd polièster ch' al gh' dà l' aspèt lùcid, e per la trâma a gnarà druè un filê gròs ed cutòun. In di negòsi al s càta in del pèsi, druèdi in dla sarturìa per fèr di vistî, del vésti e dal giàchi, mèinter ch' al s' càta anc' cunfesiunê in ruślèini 'd nàster per cuśîr di rinfòrs, del guarnisiòun e di blimèint in dla sarturìa in generêl.