Giuliano Razzoli

C'l artìcul chè 'l è scrit in Miranduléś

Giuliano Razzoli (Castelnōv di Mûnt, 18 ad Dicémbar dal 1984) 'l è un siadōr alpèṅ itagliàṅ. Al sò punt ad fòrsa 'l è 'l ślàlom speciàl in du 'l è stâ campiòṅ ulìmpic in dal 2010. Al sò scutmaj 'l è «Razzo» (Raś).

'L è élt 1,82 mét'r e al péśa 88 chilo.

Biugrafìa

Carsû a Razzolo, frasiòṅ ad Véla Mnôs in Pruìnsa 'd Réś, a taca a druàr i sî a quàt'r an. Dvintâ grand, al fà al sò eśòrdi in dla Cópa Europa in dla stagiòṅ 2004-2005, muciànd in dal córs dal tèmp, sinc pòdi e du vìnsiti. In dal 2007, al sò an più bèl, 'l à finî al sedicèśum pòst in dla clasìfica generàla e al tèrs in qvéla ad ślàlom.

'L eśòrdi

In dal 2006 al śōvan Razzoli (21 an) al vèra la pista prima dla gara ad ślàlom speciàl a gl'Ulimpìadi ad Turèṅ dal 2006 e al fà al tèrs tèmp dla prima manche. Dòp un méś al vins al tìtul ad campiòṅ itagliàṅ sèmpar in ślàlom e a la fiṅ d'l an 'l eśurdìs in dla Cópa dal Mónd in dl'Élta Badìa ma al finìs 36śum.

I prim punt Razzoli al i fà al 27 ad Śnar dal 2007 a Kitzbuehel quand al finìs 24śum.

Al prim pòdi 'l è dal Śnar dal 2009 a Śagàbria finénd tèrs dòp Jean-Baptiste Grange e Ivica Kostelić. Sèmpar lè 'l à purtâ a cà 'l prim pòst in dal 2010 davànti a Manfred Moelgg e Julien Lizeroux.

La mdaja 'd òr ulìmpica

Al 27 ad Favràr dal 2010 al s è laureâ campiòṅ ulìmpic a Vancouver in ślàlom speciàl. Ivica Kostelić e André Myhrer i vaṅ sèg in sal pòdi. A 22 an dla vitòria dal bulgnéś Alberto Tomba, 'n itagliàn al tórna acsè a vìnsar n'àtra mdaja 'd òr in dal ślàlom.

Unurificénsi

P'r al vlēr dal Presidènt dla Repùblica Giorgio Napolitano, al 10 ad Setémbar dal 2010, Giuliano Razzoli 'l è stà numinâ Cumendadōr Órdan al Mèrit dla Repùblica.