Enôṅ

Da Wikipedia.
C'l artìcul chè 'l è scrit in Carpśàn Emiliàn
N' inciśiòun eròtica 'd Agostino Carracci 'd inìsi Sesèint cui dū muróś vinghiê
Un basriliév 'd un sarcòfag 'd l' etê imperièla romàna al riguèrd 'd al giudìsi 'd Paride, in dû a s vèd, da la manca a la drìta, l' Aténa, 'l Ermes, la Vèner, l' Enôṅ cul sibiōl ed Pan e 'l Pàride cun 'l amurèin e-śvèin

Enôṅ (Enone in italiàn, Οινώνη in gréc), in dla mitulugìa gréca, l' è na ninfa, fiōla dal dio-fiùm Cebréin e l' abitèva in sìma al mòunt Ida in 'dla Tròade. L' ìva imparê l' èrt ed guarìr i malàṅ cun al pianti dal dio Apòl, che 'csè al l' ìva premièda per la só verginitê 'd i prìm tèimp.

In cal mèinter, al prìnsip truiàṅ Pàride, ch'l éra stê śluntanê fin da cìc da la só règia p'r el predisiòun funèsti in sìm' a quèl ch' a sarèv sucès in dal futûr, da putèin e pò da śóven al chèrsìva lè in dla stèsa muntàgna ed lē, fend al pastōr. I dū i dvainten muróś, e piò terdi lē la muciarà anca 'n fiōl da lò, al Corit, mo però el lōr dū strèdi i s déven divìder presti, perchè la sort dal Pàride l' al purtarà dimòndi luntàṅ da lē. L' Enôṅ la gh' armàgn mêl da la pìga ch' i tóś'n i lavór quand al Pàride al vól partìr p'r andèr a catèr l' Élena, mo subìt la n' gh' al dà mìa a vèder e ansi la gh' śibìs al só aiùt da guaridōra p'r al futûr, se lò al gh' ìs avû un quèlc malàṅ gròs.

Quand piò terd però, al Pàride al gh' avrà dabòun biśògn 'd al só aiùt per guarìr na frìda gròsa, l' Enôṅ, tròp arlièda ség, l' a nn' al vrà mia jutèr e quand pò lē la gnarà a savér che lò 'l è apèina mort, p'r al dispiaśér 'd ann avér-el mìa jutê, la s masarà a só volta da la disperasiòun.


Vóś lighèdi

Colegamèint estèren