Eighth Wonder

Da Wikipedia.
C'l artìcul chè 'l è scrit in Miranduléś Emiliàn


«
Take these dogs away from me. Your life's a mystery, mine is an open book, if I could read your mind, I think I'd take a look, I'm not scared baby, I don't care. What have you got to hide? What do you need to prove? You're always telling lies and that's the only truth, I don't care baby, I'm not scared, tonight the streets are full of actors, I don't know why, oh, take these dogs away from me before they, they bite. What have you got to say of shadows in the past? I thought that, if you paid, you'd keep them off our backs, where do we have to be, so I can laugh and you'll be free? I'd go anywhere baby, I don't care.»
(EN)(I'm not scared, 1988)
«
Para via chi caṅ da mè. La tò vita l'è un mistēr, la mia l'è 'n lìbar vèrt, se sōl a psis lèś'r t in tèsta, a créd ch'a m piaśrés dar-ag n'uciàda, a n gh'ò minga paùra amōr, a n m in fréga gnint. Cuśa gh'à't da lugàr? Cuśa gh'à't da far védar? At cònt sèmpar dal bali e quést chè 'l è 'l ùnic quèl véra, a n m in fréga gnint teśòr, a n gh'ò briśa paùra, 'sta sira al stradi i èṅ pini 'd atōr, a n sò mia parchè, oh, tiṅ m luntàṅ chi caṅ lè prima che lōr, che lōr i m mòrśgan. Cuśa gh'à't da dir in di riguàrd di punt négar dal pasâ? A iva pinsâ che, se 't à pagâ, at gh'à da butàr incòsa a 'l tò spali, in dua gh'ém-j-a 'd andàr? Acsè mè a prés rìdar e tè at sarés lìbar. Mè a 'ndarév dapartùt amōr, a n m in fréga gnint.»
(MUD)


Gl’Eighth Wonder ([eɪtθ ˈwʌndəɹ]) i èṅ un grup pop ingléś fundâ in dal 1983 ch'l à sunâ in fiṅ a 'l 1989 e pò piò. In chi an lè, la banda la gh'à abû dimóndi sucès specialmènt in Itâglia e in Giapòṅ.

La cantànta di Eighth Wonder, la Patsy Kensit

Biugrafìa

In dal 1983 al chitarìsta Jamie Kensit al tóś sò surèla Patsy, ch'la gh'iva quatórd'ś an, a cantàr in dal sò grup che in alóra al s ciamàva Spice. I àtar cumpunènt i éran Geoff Beauchamp, sèmpar a la chitàra, Lorenzo Lewis a 'l bas e Jake Walters e Nigel Davis a la baterìa. La banda la taca a śibìr-as dal viṿ in dl'Aṿtòṅ dal 1983 faghénd-'s un nóm in cla manéra lè.

Patsy Kensit tòlta śò in Frància in dal 1991

A la fiṅ dal 1984, Nigel Davis al s in và par fundàr al grup Slipstream. Al tastérista Alex Godson al s śònta a chi àtar che, in cal mèntar, i ìvan cambiâ nóm sarnénd quél 'd Eighth Wonder (Utàva maravìja).

Al prim cuncèrt cun cal nóm lè 'l è dal Nuvémbar dal 1984 a Wimbledon, in di dintóran ad Lóndra. 'L è in cal perìud lè che al regìsta Julien Temple al dòcia la Patsy Kensit śibénd-ag la part ad Crepe Suzette in dal film Absolute Beginners.

In d'l Avrìl dal 1985 al grup al taca a registràr al sò prim disc par la CBS Records pròpria mèntar la Kensit l'éra drē a giràr al sò film. In Utóbar a véd acsè la luś al sìngul Stay With Me e 'l è subìt un sucès dal nòstri bandi e anc in Giapòṅ finénd a 'l prim pòst (ma sōl 65śum in dal sò paéś). Lewis e Walters i vaṅ via e al grup al taca a druàr la drum machine e a 'l tastéri a 'l pòst dal bas.

In dal méś 'd Agóst gl’Eighth Wonder i vólan a Los Angeles par registràr insém a Mike Chapman, famóś p'r avér laurâ cun i Blondie, al sò àlbum ad debùt. In dal Favràr dal 1987 a vèṅ fóra cuma sìngul al braṅ Will You Remember? ch'al gh la cava a finìr in di prim déś pòst in Itâglia mèntar When the Phone Stops Ringing ch'a vèṅ dòp al gh'à da cuntintàr-as dal pòst vint-siē.

Mèntar i éran drē a finìr al disc, al grup al patìs 'l abandòṅ anc ad Godson. Steve Grantley al tōś al sò pòst da drē da la baterìa. Al braṅ I'm Not Scared, scrit da i Pet Shop Boys e da Phil Harding, a vèṅ sarnî p'r èsar al sìngul sucesìṿ e 'l è un sucès dapartùt: prim pòst in Itâglia, secónd pòst in Śvisra e Purtugàl, tèrs in Spaggna, quàrt in Grécia, quìnt in Germâgna e via acsè. Da cl'atra banda dal 45 gir a gh'è na versiòṅ cantàda in francéś (J'ai Pas Peur).

In dal Maǵ dal 1988 'l è al tùran ad Cross My Heart, àtar braṅ famóś dal grup, ch'al finìs in di prim quìndas pòst in soquànt paéś dal nòstar cuntinènt e a 'l 56śum pòst in di Stat Unî. In dal stés an, la cantànta Martika la 'l canta in dal sò disc umònim.

Dòp àtar dū sìngui (Baby Baby dal 1988 e Use Me dal 1989), al grup al s mòla e la Patsy Kensit la taca na caréra in dal mónd dal cìnema a tèmp pîṅ.

Al grup 'l à fat in tèmp a sunàr par dū vòlti a Sanremo: in dal 1987 cun Will You Remember (quànd a la Patsy al gh casca śò al sò vistî śgalvî faghénd védar un cunsèṅ ad téta) e 'l an dòp cun I'm Not Scared. Invéci Cross My Heart 'l è stâ sunâ a 'l Festivalbar.

Mémbar

  • Patsy Kensit vóś
  • Jamie Kensit chitàra
  • Geoff Beauchamp chitàra
  • Lawrence Lewis bas
  • Alex Godson tastéri
  • Jake Walters baterìa
  • Nigel Davis baterìa
  • Steve Grantley baterìa

Discugrafìa

Àlbum

  • 1987 - Brilliant Dreams
  • 1988 - Fearless
  • 1989 - Eighth Wonder: The Best Remixes (gnû fóra sōl in Giapòṅ)

Sìngui

  • 1985 - Stay with Me
  • 1986 - Having It Al
  • 1987 - Will You Remember
  • 1987 - When the Phone Stops Ringing
  • 1988 - I'm Not Scared
  • 1988 - Cross My Heart
  • 1988 - Baby Baby
  • 1989 - Use Me

Culegamènt estéran