Cimōśa

Da Wikipedia.

C'l artìcol chè 'l è scrit in Carpśàn Emiliàn

Na cimōśa ciacarèina
Na cimôśa ciacarèina e anca d' un culôr diferèint

In dal camp edla tesdûra, el cimōśi, ciamèdi anca vivàgn, egl'în chel dō perti in dû a finìs al tisû, a la sô drìta e a la manca quànd al vin śò dal tlêr. 'L è cal cunfîn dal tisû che pròpia per cuma 'l è custruî (mìa tajê) al ne śbavèśa per gninta i sô fîl e ansi al pól dèr dla robustèsa in più a tùta la pèsa de stòfa. La distànsa tra 'l cimōśi di du cô dla stòfa, la s ciàma "altèsa" (p'r i profâṅ larghèsa) edla pèsa.

La cimōśa la s' fórma in di du cô 'd urdî dla stófa, perché la navèta dla trama dôp 'd aver pugê 'l fîl in dal só pas, in dal só cô finêl la fa 'l gîr per salìr un gradèin più sù in dla tesdûra e turnèr da cl èter cô.

El só particolaritê

  • Per irobustîr el dū cimōśi, in di dū cô estèren dal tlêr despès a s dòpia la quantitê 'd fîl edl urdî ch'i pasen ded lè.
  • L'armadûra dla cimōśa la pōl èser diferèinta da quèla dal tisû, sovertùt per dal ragiòun 'd reśistèinsa (c'ma p'r eśèimpi, ind un tisû uvrê, la cimōśa l'è despès in tela).
  • Na quèlc volta la cimōśa la gh'à 'n culôr diferèint da 'l rèst edla pèsa, e quand pò qvesta chè la vìn stampèda, al diśègn 'l è bèin difìcil ch'al riva infîn al dû cimōśi, anca perchè mìa ùtil fin là 'd cô.
  • Quand la cimōśa la gh'à di buśèin ch'i gh'pasen da mêś in na manéra regulêr, a vōl dir che in dal tèser-la a s è druê 'n tempiêl per mantgnìr piò custànta e fìsa l'"altèsa" dla pèsa e nn' artirèr-la minga.
  • Na quèlc vòlta a s pōl catèr dal "cimōśi ciacarèini", a dir ch'i gh'àn tisù o anca stampê in sìma na firma 'd vistî o dal qualitê dal tisû da n'śminghèr minga.

Cla diferèinta qualitê chè dal cimōśi in di cunfròunt dal rêst edla pèsa, i la fan despès difìcil da druèr e a alóra, mèinter ch'a s prepèra un quèlc lavōr sartoriêl, a ghe srà anc da tajèr-la vìa.


Colegamèint estèren