Britney Spears

Da Wikipedia.
C'l artìcul chè 'l è scrit in Miranduléś Emiliàn


«
It’s Britney, bitch. I see you and I just wanna dance with you. Everytime they turn the lights down just wanna go that extra mile for you, you got public display of affection, feel’s like no one else in the room (but you). We can get down like there’s no one around, we’ll keep on rockin’, we’ll keep on rockin’. Cameras are flashing while we’re dirty dancing, they keep watchin’, keep watchin feels like the crowd is saying, Gimme gimme more.»
(EN)(Gimme more, 2007)
«
L'è la Britney, la rója. A t véd e a vój sōl balàr tèg. Tut al vòlti ch'i śmòrsan al luś, mè a vrév far un quèl da piò par tè, na dimustrasiòṅ 'd afèt in pùblic, 'l è cuma s'a n gh fus ninsòṅ àtar in dla stansa (sōl tè). A psém dar-ag dèntar cuma s'a n gh fus ninsòṅ chè 'd intóran, a cuntinuarém a mōv'r-as, a mōv'r-as. I s tōśan śò mènt'r a sém drē a far chi bai chè spuraciòṅ, i s tìnan 'd òć, i cuntìnuan a guardàr, l'è cuma se la gint la dgis: dà-'m dà-'m da piò.»
(MUD)


La Britney Jean Spears (McComb, 2 ad Dicémbar 1981) l'è na cantànta pop, balarìna e atōra americàna. In dal sò caréra l'à vindû da piò ad sènt migliòṅ ad disc in tut al mónd rivànd a èsar la sésta artìsta fémna in fat ad vénditi.

La Britney tòlta śò a Boston mèntar la canta Womanizer

Biugrafìa

La Spears, nada a McComb in dal 1981, la crés a Kentwood, in dal stat dla Louisiana. L'è la secónda di tri fradèi, Bryan e Jamie Lynn. I sò genitōr Jamie Parnell Spears e Lynne Irene Bridges i la màndan a tri an a studiàr dansa a Kentwood e pò anc ginàstica e cant. Britney la vins soquànti cumpetisiòṅ a livèl statàl e anc dal gari par putèṅ.

Gl'Inìsi

A òt an, la Spears e sò màdar Lynne i viàśan in fiṅ a Atlanta par far n'audisiòṅ dal "The Mickey Mouse Club" ma l'è tròp pìcula par partecipàr a i spetàcui e la sarà sarnìda sōl in dal Dicémbar dal 1992 insém a Justin Timberlake, Joshua Chasez (i dventaràṅ famóś in séguit sunànd in di 'N Sync), Christina Aguilera e Ryan Gosling. In cal mèntar la fà dal reclàm e di lavursèṅ in televiśiòṅ.

Quànd al spetàcul al vèṅ scanślâ, la Spears la tórna a Kentwood e la s iscrìv a la Parklane Academy.

In dal Śugn dal 1997, la Spears la ś mét in cuntàt cun al manager Lou Pearlman dmandànd ad śuntàr-as a 'l grup fat ad fémni Innosense. In cal mèntar la Lynne la s dà da far mandànd dal foto e na registrasiòṅ ad na canta ad Whitney Houston fata par sò fiōla a 'l amìg manager Larry Rudolph. Chi lò al decìd a dar-gh un cuć faghénd-la cgnósar a soquànti cà discugràfichi ma a gh'éra da preparàr un demo prufesiunàl.

A cal punt lè al śibìs a la Britney un scart dla Toni Braxton e lē la 'l canta in na stmana par pò andàr a purtàr la registrasiòṅ a quàtar cà discugràfichi a New York. Sōl la Jive Records la cata al lavōr interesànt, chi atri tri i pascàvan dal bandi quài Backstreet Boys e al Spice Girls, dgénd ch'a n gh sarés mai stada n'atra Madonna, n'atra Debbie Gibson o n'atra Tiffany.

La Jive la gh manda al prudutōr Eric Foster White p'r un méś e dòp la decìd ad far-ag far 'n àlbum tgnénd a drē a 'l stîl pop, ch'al s psiva anc balàr, e minga a quél dla Sheryl Crow ch'l éra quél ch'l'iva sarnî par lē a 'l inìsi la Britney Spears.

'L è acsè che la Britney la tóś 'n aparéć par vulàr a i Cheiron Studios ad Stucólma par registràr in part al sò prim disc, da Mars a Avrìl dal 1998, cun sèg i prudutōr Max Martin, Denniz PoP, Rami Yacoub e àtar incóra.

...Baby One More Time

Britney la s śibìs a i NFL Kickoff

Turnàda in di Stat Unî, la Spears la taca un gir prumusiunàl in di sèntar cumerciài, cun 'l ubietìṿ ad far cgnósar al sò disc ch'l éra drē a gnir fóra. Chi spetaculèṅ lè i vdìvan dū balarèṅ śibìr-as mèntar lē la cantàva quàtar pès. La Brintney la vèra anc di cuncèrt di 'N Sync.

In dal Śnar dal 1999 a véd finalmènt la luś al sò prim disc Baby One More Time (Amōr incóra na vòlta) e al finìs subìt a 'l prim pòst in dla Billboard 200 dvintànd dòp sōl un méś disc ad plàtin dòpi.

A livèl mundiàl, 'l àlbum al và in di pòst élt dal clasìfichi in quìndas paéś, vindénd da piò ad déś migliòṅ ad còpi in 'n an e cavànd-gh-la a dvintàr al disc fat da 'n śuvnòt più vindû ad sèmpar. La canta ch'la gh dà 'l tìtul l'è al prim sìngul e al vénd un quèl cuma sincsènt-mila còpi subìt a 'l prim dè, restànd in véta par dū stmani ad fila in dla clasìfica di sìngui. In tut 'l à pò vindû nóṿ migliòṅ ad còpi. Sometimes, (You Drive Me) Crazy e Born to Make You Happy i èṅ i àtar sìngui mèntar la canta From the Bottom of My Broken Heart l'è gnuda fóra da par lē sōl p'r al marcâ americàṅ e austragliàṅ.

«
Boy you got me blinded, oh pretty baby there's nothing that I wouldn't do, it's not the way I planned it, show me how you want it to be, tell me baby 'cause I need to know now, oh because my loneliness is killing me, I must confess I still believe when I'm not with you, I lose my mind, give me a sign, hit me baby one more time.»
(EN)(Baby one more time, 1999)
«
Baghét tè ta m imbarbàj, oh bèl ragàs a n gh'è gnint ch'a n vója far, a n è minga cum a 'l m séra figurâ, móst'r-um cum at vrés ch'al fus, dì-'m al parchè a gh'ò biśógn ad savér-'l adès, oh parchè 'l èsar acsè da par mè 'l è drē a masàr-um, a t al dig franca ch'a gh créd incóra quànd a n sòṅ minga tèg a pèrd la tèsta, dà-'m un ségn, squàs-um incóra na vòlta teśòr.»
(MUD)

Oops!... I Did It Again

Britney cavàda śò

Oops!... I Did It Again (Óhi, a 'l ò fat incóra), al sò secónd àlbum, 'l è stâ publicâ in dal Maǵ dal 2000 e 'l à vindû 1,3 migliòṅ ad còpi in dla prima stmana, piasànd-as a 'l prim pòst dla clasìfica americàna, e vint migliòṅ in tut (déś in dal sò paéś), dvintànd un disc ad diamànt. Al prim sìngul al pòrta al stés nóm d'l àlbum e anca lò al vénd bèṅ, specialmènt in Austràglia, Śelànda Nóva e Régn Unî tant che chè al ś mét in véta. Àlbum e sìngul i èṅ stâ numinâ a i Grammy Award cuma "Best Pop Vocal Album" e "Best Female Pop Vocal Performance".

«
Oops! I did it again, I played with your heart, got lost in the game, oh baby baby, oops! You think I'm in love that I'm sent from above, I'm not that innocent.»
(EN)(Oops! I did it again, 2000)
«
Óhi, a 'l ò fat incóra, a-j-ò śugâ cun al tò cōr, a séra pardùda in dal śōg, oh teśōr, óhi, at créd ch'a t vója bèṅ, ch'i m àppian mandâ da là 'd sōvar, a n sòṅ minga acsè tant a mōd.»
(MUD)

Par cal lavōr chè, a gh dà na maṅ la Shania Twain che, insém a sò marè Mutt Lange, la scriv al sìngul Don't Let Me Be the Last to Know, mèntar i àtar dū sìngui i èṅ Stronger e Lucky.

In dl'Istâ dal stés an al partìs al sò prim tour mundiàl ch'al gh fà ciapàr 40,5 migliòṅ ad dòlar. Insém a sò màdar la Spears la scriv pò al lìbar Britney Spears Heart-to-Heart.

Al 7 ad Setémbar dal 2000, Britney la s śibìs a i MTV Video Music Awards e, mèntar l'éra drē a far al sò pès, la sa sćiànca al vistî négar ch'la gh'iva adòs faghénd védar che 'd sóta la gh 'n iva òṅ culōr carna. La Britney cun al trési tuta cà e cēśa di inìsi la fà al pòst a na Britney più spurcaciòna e malnéta, prònta a tacàr na relasiòṅ cun al sò vèć amìg Justin Timberlake.

Dū muśicìsta, Michael Cottril e Lawrence Wnukowski, i aṅ in séguit fat càuśa a la cantànta e a la sò cà discugràfica dgénd che lì lōr i ìvan cupiâ What U See (Is What U Get) e Can't Make You Love Me parténd da di pès suo.

Britney

La Britney pigàda a nuànta la tîṅ 'd òć un sò balarèṅ ligâ a 'n pâl

In dal 2001 la cantànta la ś mét 'd acòrd cun la Pepsi Cola par far-ag la reclàm e la ciàpa 8 migliòṅ ad dòlar. In cal mèntar, insém a sò màdar, la scrìv un secónd lìbar ch'la dascór ad lē, A Mother’s Gift.

Al déś ad Setémbar dal 2001, al dè prima d'l atintâ a 'l Tór Śmèli, la fà un duét cun Michael Jackson a 'l Madison Square Garden ad New York cantànd The Way You Make Me Feel par festegiàr al 30śum aniversàri dal caréra dal rè dal pop. Dòp al diśàstar, la dà a 'l vitmi dal masàcar na part di fónd catâ sù cun al braṅ What's Going On incìś, insém a Gwen Stefani, Christina Aguilera, Beyoncè e àtar, par la lòta còntra 'l AIDS.

In Nuvémbar a véd la luś al tèrs sò disc, Britney, dódas migliòṅ ad còpi vindùdi in tut al mónd e prim pòst in clasìfica in di Stat Unî, Austràglia e Régn Unî.

Al prim sìngul tirâ fóra 'l è stâ I'm a Slave 4 U (A sòṅ na sćiàva par tè). In dal vìddeo a ś véd na Spears mója andgàda ad sudōr strusiàr-as daśnumóśa atàc a di masć. Ma a far scàndal, p'r i animalìsta dla PETA, l'è pò la sò eśibisiòṅ a i MTV Video Music Awards dal 2001 quànd la canta cal braṅ lè in frònt a na tigra in gàbbia e a un pitòṅ śbiàvad pugiâ atàc a 'l sò spàli. La gh và méj cun al sìngul Overprotected numinâ a Grammy Award.

In dal Favràr dal 2002 la fà al sò debùt cum atóra in dal film Crossroads - Le strade della vita. Lē la vèṅ bcada p'r i crìtic ma la pelìcula la ciàpa i sò bèsi listés: 61 migliòṅ ad dòlar muciâ sù quànd l'éra custàda sōl 12.

In dal 2002 i védan la luś soquànt àtar sìngui a partìr da Favràr: I'm Not a Girl, Not Yet a Woman (A n sòṅ minga na baghéta ma gnanc incóra na dóna, druàda anc in dal film Crossroads), I Love Rock 'n' Roll (Al rock'n'roll al m piàś, Maǵ, cover ad Joan Jett), Anticipating (Luj) e Boys (Agóst, braṅ rimixâ par Pharrell Williams e druâ in dal film Austin Powers in Goldmember).

P'r apugiàr al disc, la Spears la partìs p'r al Dream Within a Dream Tour, un pachét ad cuncèrt ch'al gh fruta da piò ad 43 migliòṅ ad dòlar.

«
I feel like talking, feel like dancing when I see this guy, what's practical is logical. What the heck, who cares? All I know is I'm so happy when you're dancing there, I'm a slave for you, I cannot hold it, I cannot control it, I'm a slave for you, I won't deny it, I'm not trying to hide it. Baby, don't you wanna dance upon me (I just wanna dance next to you) to another time and place. Baby don't you wanna dance upon me (are you ready), leaving behind my name, my age. Let's go, like that, you like it, now watch me, get it, get it.»
(EN)(I'm a Slave 4 U, 2001)
«
A m vèṅ vója ad dascórar e ad balàr quànd a véd cal baghét lè, quél ch'l è còmad 'l è lògic. 'D un Dio, cas m in fréga? Tut quél ch'a sò è ch'a sòṅ cuntènta un muć quànd at bal lè, a sòṅ na sćiàva par tè, a n gh la cav minga a reśìst'r-ag, a pèrd al cuntròl, a sòṅ na sćiàva par tè, a n al negarò mia, a n sòṅ briśa drē a lugàr-al. Amōr, vō't minga balàr-'m ad sōvar? (a vój sōl balàr tèg), vèrs 'n àtar tèmp e 'n àtar pòst. Amōr, vō't minga balàr-'m in sima? (sē't prònt?), daśménga al mè nóm, i mè an. Andém, acsè, al t piàś, guàrd-um adès, tó'l, tó'l.»
(MUD)

In the Zone

La Britney la s tira sù la stanèla a Cleveland

In dal Dicémbar dal 2002, Timberlake al fà un vìddeo dal sìngul Cry Me a River, in dua a ś véd na ragasōla ch'la sumìlia a la Spears, faghénd pinsàr la gint ch'la popstar la gh'àppia mis i còran. La cantànta la gh rispónd scrivénd al lènt (e futùr sìngul) Everytime insém a la sò amìga e curìsta Annet Artani.

La Spears la vèra pò i MTV Video Music Awards dal 2003 insém a la Christina Aguilera, cantànd na Like a Virgin dimóndi spurcacióna. A metà dla canta la s śònta anc la Madonna, ch'la fà scàndal dand un basèṅ in bóca a tut al dū. 'L avenimènt al gh'à abû dimóndi sèguit.

In dal Nuvémbar dal 2003 a vèṅ fóra In the Zone, al sò quàrt àlbum, prudót insém a di artìsta quài Moby, R. Kelly e Puff Daddy. In cal lavōr chè la Spears la taca a scrìvar di pès anca lē, cum al prim sìngul Me Against the Music, cantâ cun la Madonna. R. Kelly invéci al gh dà al braṅ Outrageous, braṅ gnû fóra da par lò anca lò (ma sénsa vìddeo parchè Britney la s éra fata mâl a 'n śnòć durànt a 'l tòlti śò e la n éra briśa bòna ad finìr al filmâ), acsè cuma Toxic, un sucès anc in Itâglia (quàrt pòst, in clasìfica pò par 31 stmani ad fila) e vinsidōr 'd un Grammy Award cuma "Best Dance Recording" e mijór sìngul in fat ad vénditi da quàt'r an a cla banda.

Àtar dū pès i arévan duvû gnir fóra anca lōr cuma sìngui (la sensuàla Breathe on Me e al duét fat insém a Ying Yang Twins I Got That Boom Boom) ma pò l'è andàda diversamènt.

In tut In The Zone 'l à pò vindû da piò ad déś migliòṅ ad còpi in tut al mónd.

«
Losin' my head, spinnin' 'round and 'round, do you feel me now? With the taste of your lips, I'm on a ride, your toxic tongue slippin' mine with the taste of the poison paradise, I'm addicted to you, don't you know that your toxic? And I love what you do, don't you know that your toxic? It's getting late to give you up, I took a sip from a devil's cup, slowly, it's taking over me.»
(EN)(Toxic, 2003)
«
A pèrd la tèsta, a pril chè 'd intóran, sènt-at adès ch'a gh sòṅ? Cun al savōr di tò làbar, a sòṅ a cavàl, la tò lìngua tòsica la m ślìcia dèntar cun al tò gust 'd un paradìś a 'l vlèṅ, a sòṅ drugàda ad tè, ta n al sà minga ch'at sē tòsic? E 'l a m piàś quél ch'at fà, ta n al sà minga ch'at sē tòsic? 'L è dvintâ tard par dar-ag sù, a-j-ò bvû un gós da la cópa dal diàvul, piàn piàṅ, a végn méno.»
(MUD)

Greatest Hits: My Prerogative

Qualchidòṅ 'l è drē a bindàr la Spears

Scanślâ al tour dal 2004 p'r èsar-'s fata mâl a 'n śnòć, la Spears l'è custréta a turnàr a cà par far soquànti stmani ad riabilitasiòṅ, cun al śés a na còsa. In d'l Aṿtòṅ dal stés an la spóśa al balarèṅ Kevin Federline e pò la fà gnir fóra un parfùm fat da lē insém a la Elizabeth Arden ciamâ Curious. In Utóbar la fà savér ch'la gh'à vója ad tōr-as na pàuśa par métar sù famìja.

P'r inganàr al tèmp, la sò cà discugràfica in Nuvémbar la fà catàr in di negòsi la sò prima racòlta, Greatest Hits: My Prerogative ch'la vénd un quèl cuma nóṿ migliòṅ ad còpi in dal mónd intēr. I braṅ inèdit, sarnî anc cuma sìngui, i èṅ My Prerogative (cover ad Bobby Brown vindùda bèṅ anc in dal nòstar paéś) e Do Somethin’.

«
What ya gonna do when the crowd goes, waaoo, why ya standing on the wall? Music starting everywhere so why don't you just move along? I see you looking at me like I'm some kind of freak, get up out of your seat, why don't ya do somethin?»
(EN)(Do Somethin’, 2004)
«
Cuśa farà't quand la fóla la s in và? waaoo, parchè stà't incòst a 'l mur? La mùśica l'è drē a partìr dapartùt alóra parchè ta n t davśèṅ briśa? A t véd ch'ta m tîṅ 'd òć cuma sa fus na spèci ad móstar, tó-'t sù da cla scrana, parchè fà't minga quèl?»
(MUD)

A la fiṅ dal 2004, la Spears la traśmét na sò canta nóva a la ràddio ad Los Angeles KIIS-FM ch'la s ciàma Mona Lisa, un demo 'd un prugèt pò aburtî, sénsa ch'a s in sàppia al mutìṿ, Original Doll.

'L an dòp la Britney la s dà a 'l reality show, insém a sò marè, dand vita a 'l spetàcul "Britney and Kevin: Chaotic" (traśmìs in Itâglia par Sky). Al canti druàdi lè dèntar i sarvìsan in séguit par far gnir fóra un sìngul e pò 'n EP dal braṅ Someday (I Will Understand).

B in the Mix: The Remixes

La Spears in śnòć a gambi vèrti durànt òṅ di sò balét

In dal Nuvémbar dal 2005 l'è al tùran dna racòlta ad braṅ rimixâ B in the Mix: The Remixes che però la vénd pròpria pôc (a s fà par dir, un migliòṅ ad còpi, e disc ad plàtin listés) parchè la patìs al fat ch'la n gh'àppia minga abû dla prumusiòṅ. In dal Régn Unî e in di Stat Unî al disc a n gh la cava briśa a finìr in di prim sènt pòst in clasìfica. Al và un pó méj dal nòstri bandi parchè 'l àlbum al riva in dla 59śima puśisiòṅ.

In sal disc i gh'aṅ laurâ i più grand remixer mundiài cuma Peter Rauhofer, Jacques Lu Cont (che pò al sarés Stuart Price, prudutōr d'l àlbum Confessions on a dance floor ad Madonna), Justice, Junkie XL e Jason Nevins.

La versiòṅ europea la gh'à dèntar ùndas trasi cun 'l inèdit And Then We Kiss, gnû fóra cuma sìngul in Àśia e in dal DVD ingléś e giapunéś ad Britney & Kevin: Chaotic.

«
Lying alone, touching my skin, I'm falling under a girl like me and I can't hold it in, it makes me wonder. Is this for real? It's not what it seems, you're like an angel, I'm running now, my feet off the ground. Take me, touch me, won't you hold me close? And then we kiss, your love comes alive on my lips, I feel the rush, coming over me, over me, and when we touch, This moment when everything's still, I close my eyes and then we kiss.»
(EN)(And Then We Kiss, 2005)
«
A sòṅ culgàda da par mè e a m carés, a céd, na baghéta cuma mè e a n pòs briśa tgnir-um, 'l è surprendént. È'l un quèl véra? Al n è minga cum al pâr, at sē cuma 'n àngil, a sòṅ drē a cùrar adès ma i mè pē i n èṅ mia piugiâ par tèra. Tó-'m, tóc-um, ta n m strinsérà minga da piò 'd acsè? E pò a s baśém, al tò amōr al dvénta viṿ in si mè làbar, a sènt na silta ch'la m cur adòs, adòs, e quànd a s tuchém, cal mumènt chè quànd tut i quèi i èṅ férum, mè a sèr i òć e pò a s baśém.»
(MUD)

Blackout

La Spears in un cuncèrt in Ucraìna

Al 10 ad Setémbar dal 2007 la Spears la s preśénta a i MTV Video Music Awards ad Las Vegas par cantàr al sò nóṿ sìngul, Gimme More, ma 'l è tròp ingiangulàda, indulénta, stranìda, imbalsìda e inśdìda par balàr, la par un stucafìs, e la n imbròca gnanc na paròla dla canta, tant che la Rihanna la s la rid da sóta 'l palc, mèntar 50 Cent al n créd a i sò òć [1]. David Willis dla BBC al diś che cl'eśibisiòṅ lè la sarés pasàda in dla stòria cuma una dal più lòfi ad sèmpar 'd MTV[2].

Quànd però in Utóbar al vèṅ pò fóra al sò quìnt disc da studi, Blackout, al s piàsa listés a i prim pòst dal clasìfichi mundiài (in véta in Cànada e Irlànda, secónda puśisiòṅ in di Stat Unî, Francia, Giapòṅ, Mèsic e Régn Unî) vindénd da piò ad tri migliòṅ dal còpi in tut e 438.000 sōl in dla prima stmana.

'L an dòp Blackout al vinsarà al prèmi "Album of the Year" a i MTV Europe Music Awards dal 2008 e al finìrà a 'l quint pòst di àlbum pop fat méj in chi déś an lè dal Times.

In Śnar dal 2008 a véd la luś al secónd sìngul Piece of Me (canta in dua la Spears la in diś quàtar a tut e ch'la dvénta disc ad plàtin in dal sò paéś e prim pòst in Irlànda). Al tèrs braṅ a gnir fóra da par lò (sénsa prumusiòṅ da part dla cantànta) 'l è Break the Ice, cun un vìddeo fat a cartòṅ animâ.

«
Guess I can’t see no harm in working and being a mama and with a kid on my arm, I’m still an exception and everybody want a piece of me. I’m Mrs. "Lifestyles Of The Rich & Famous" (you want a piece of me?), I’m Mrs. "Oh My God, That Britney’s Shameless!" (you want a piece of me?), I’m Mrs. "Extra! Extra! This Just In!" (you want a piece of me?), I’m Mrs. "she’s too big, now she’s too thin" (you want a piece of me?), I’m Mrs. "You want a piece of me?", Tryin’ and pissin’ me off.»
(EN)(Piece of Me, 2007)
«
A n gh véd gnint ad mâl in dal lauràr e a far la màdar cun un putèṅ in bras, a sòṅ sèmpar un quèl fóra da la nòrma e tut i vōlan un pès ad mè. A sòṅ la sgnóra "Mòd ad vìvar di ric e famōś" (vlî'v un pès ad mè?), a sòṅ la sgnóra "'D un Dio, cla śvargugnàda dla Brtitney!" (vlî'v un pès ad mè?), a sòṅ la sgnóra "D'l àtar! D'l àtar! Quést chè 'l è fîg!" (vlî'v un pès ad mè?), a sòṅ la sgnóra "l'è na budlòna, adès l'è tròp magra" (vlî'v un pès ad mè?). A sòṅ la sgnóra "Vlî'v un pès ad mè?" a pésc da tiràr-um fóra di maròṅ.»
(MUD)

In dal Mars dal 2008, la Spears la fà la sò cumpàrsa in d'l epiśòdi "Déś sedùdi" dal telefilm "E a la fiṅ la riva la mama" faghénd la part dla dóna dla reception Abby e faghénd-ag far al rècord di spetadōr.

Al 7 ad Setémbar dal 2008 la Spears la và a i MTV Video Music Awards e la vins di prèmi p'r la canta Piece of Me.

Circus

Britney sintàda in sna plinga

Al sèst àlbum dla popstar 'l è Circus, fat gnir fóra in dal Dicémbar dal 2008 e spricâ fiṅ da subìt a 'l prim pòst in soquànt paéś cuma Stat Unî, Cànada e Repùblica Céca ('l à tucâ la cìffra ad tri migliòṅ e mèś ad còpi vindùdi). Al prim sìngul Womanizer 'l è dvintâ al sò prim braṅ a turnàr al nùmar òṅ dla Billboard Hot 100 da i tèmp ad Baby One More Time vindénd 286.000 còpi in na sōla stmana ad dascargamènt da la réda e ciapànd na nomination a i Grammy Award in dla categurìa "Best Dance Recording". Prim pòst par cla canta lè anc in dimóndi paéś dal nòstar cuntinènt.

«
Daddy-o, you've got the swagger of a champion, to bad for you, you just can't find the right companion, I guess when you have one too many, makes it hard, it could be easy, who you are, that's just who you are, baby. Lollipop must mistake me for a sucker to think that I would be a victim, not another, say you're playin how you want it, but no way I'm never gonna fall for you, never you, baby. Womanizer, woman-womanizer, you're a womanizer, oh, womanizer, oh, you're a womanizer, baby, you you you are, you you you are, womanizer, womanizer, womanizer, womanizer. Boy don't try to front, I know just what you are.»
(EN)(Womanizer, 2008)
«
Vê, fighét! At gir spavàld cuma 'n campiòṅ, la ś mét mâl par tè, ta n catarà mai na cumpàggna bòna par tè, mè a créd che quànd ta gh 'n à una ad tròp, la dvènta dura, a prév èsar fàcil, ma tè at sē acsè, at sē acsè, umàsa. Caramèla da lcar, at pinsarà ch'a sòṅ na cajòna s'at cardìṿ ch'a sarés stada na tò vitma e briśa n'atra, at créd ad psér-um prilàr cum at vō, ma a n m pigarò mai, lasa pèrdar dulcésa. Purcùs, purcòṅ cun al dóni, at sē 'n purcùs, oh purcùs, at sē 'n purcùs, belésa, tè tè tè at sē, tè tè tè at sē, 'n purcùs, purcùs, purcùs, purcùs. Minga pruàr a butàr-'m i òć adòs, mè a ta cgnós.»
(MUD)

In dal Mars dal 2009 la Spears la partìs par na tournée in gir p'r al mónd e la fà sù 131.8 migliòṅ ad dòlar in cla manéra lè (quint tour d'l an in fat ad vénditi). Al secónd sìngul, Circus, al vénd 5,5 migliòṅ ad còpi esénd al dècim braṅ più vindû dal 2009. Al 12 ad Mars dal 2009, in sal sit uficiàl dla cantànta, a vèṅ fat védar al vìddeo dal tèrs sìngul, If U Seek Amy, dirèt p'r al regìsta Jake Nava. Cal braṅ lè 'l à fat discórar dimóndi parchè a livèl vucàl al tìtul, ch'al vōl dir S'at pésc Amy, a par ch'al sia al spelling ad F.U.C.K. ME (Fót-um). A gh'è tèmp anc par far gnir fóra un quàrt sìngul, cal Radar sìngul mancâ ad Blackout che chè al cata al sò pòst cuma bonus track.

Vita privàda e Petegulés

Da drē da la mascra a gh'è la Britney Spears

La vita privàda dla cantànta l'è da spés finìda in si giurnài e in dal rivìsti di petegulés, cuma pròpria lē la cònta anc in dal braṅ Piece of me. Par réndar al ròbi ciàri e cuntàr i quèi cuma lē la i véd, la Spears la gira a la fiṅ dal 2008 un ducumentàri dal tìtul Britney: For the Record.

A cavàl di an Nuànta e Dumìla Britney la s éra misa insém a 'l cantànt Justin Timberlake ma cun lì lò al ròbi i finìsan mâl. Soquànt an dòp, al 3 ad Śnar dal 2004, la spóśa al sò amìg ad quànd l'éra pìcula, Jason Allen Alexander, in dla cēśa "The Little White Wedding Chapel" ad Las Végas in dal stat dal Nevàda. Al matrimòni al vèṅ però ściancâ parchè nul sōl sinquantasìnc óri dòp parchè la Spears la n éra briśa bòṅ 'd inténdar quél ch'l'éra drē a far.

In dal Luj dal stés an la ś mét insém a 'l balarèṅ americàṅ Kevin Federline ch'l'va cgnusû tri méś prima. Chi lò 'l iva péna mulâ l'atóra Shar Jackson ch'l'iva da parturìr un putèṅ, faghénd acsè dascórar un muć i mèddia. Dòp dū méś la 'l spóśa al 18 ad Setémbar ma la gh'à da spetàr incóra tri stmani p'r èsar la sò spóśa dabòṅ in frónt a la léǵ parchè la n s éra incóra misa 'd acòrd sèg in di aspèt ligâ a i pat prematrimuniài.

Al 14 ad Setémbar la Spears la dà a la luś al sò prim fiōl, Sean Preston Federline. In dal Favràr dal 2006 i tàcan a giràr dal fòto in dua a ś vdiva la cantànta giràr in màchina cun al sò putèṅ in bras, un quèl dimóndi periculóś che lē la próa a diféndar dgénd ch'la 'l iva fat par scapàr via da i paparàś, dmandànd però pardòṅ ad la casàda fata. Al 12 ad Setémbar dal 2006 al nas Jayden James, al sò secónd putèṅ, ma sōl dū méś dòp la vōl divursiàr listés da sò marè par via dal difarénsi ad caràtar che, a sò dita, a n sa psiva minga mét'r a pòst. Al divòrsi al vèṅ fat dabòṅ in dal Luj dal 2007 cun i dū ch'i ś métan 'd acòrd par tgnir a drē a i fiōi insém.

In cal mèntar Britney, ch'la gh'iva di prubléma ad dròghi, la và a Antìgua in un sèntar ad riabilitasiòṅ al 16 ad Favràr dal 2007 ma la n gh stà dèntar gnanc un dè, scapànd via subìt. La nòt dòpa, dal tut fóra 'd tèsta, la s taja da par lē tut i sò cavìi parchè la paruchéra in un negòsi a Tarśàna in Califòrgna la n al vliva minga far[3].

Un balét dla Britney Spears in sima a na mòta

Par quéi ch'i la cgnósan bèṅ, i festîṅ in du al gìra a tut andàr d'l àlcol i l'aṅ fata dvintàr n'imbariagòsa, bòna ad métar in imbaràs anc la sò amìga Paris Hilton, faghénd-as futugrafàr méntar la dà dal śnum a dal dóni o sénsa mudàndi adòs[4].

In clìnica la gh tórna da par lē soquànt stmani dòp, faghénd-as curàr e scrivénd in dal sò sit web: «A-j-ò tucâ al fónd dabòṅ. Adès a n péns minga ch'al mè prubléma al fus 'l àlcol o la depresiòṅ. [...] a séra cuma na putìna catìva ch'la cur in gir cun 'l ADD (Sìndrum dal deficit 'd atensiòṅ e dal diav'l adòs)». Al prim 'd Utóbar dal 2007 la pèrd al dirìt ad tgnir sèg i sò fiōi sénsa però ch'al giùdas al cuntìs in pùblic i mutìṿ dla deciśiòṅ tòlta.

In dal Dicémbar dal 2007, la Spears la taca na relasiòṅ cun al paparàś Adnan Ghalib e pò, al 3 ad Śnar dal 2008, la ś mét ad travèrs in dal dar indrē i sò fiōi a i rapresentànt dal marè ch'i éran gnû a tōr-i da lē. La pulisìa, gnuda a cà sua in cal mèntar, nunànd ch'la cantànta la parìva sóta 'l efèt dla dròga, a n capénd gnint, la la manda subìt a 'l Cedars-Sinai Medical Center, e pò a s vèṅ a savér che la Britney l'iva tòlt al clenbuterōl, na dròga p'r i cavài, insém a dla vodka, d'l ecstasy e di anfetamìni. Al dè dòp a gh vèṅ tirâ via al dirìt ad védar i sò fiōi, dâ dal tut a Federline[5].

A la fiṅ dal méś la vèṅ purtàda cun un tratamènt sanitàri ubligatòri in dal repàrt psichiàtric dal Ronald Reagan UCLA Medical Center. I giùdas i la dànan in afidamènt a sò pàdar James Spears e a 'l prucuradōr Andrew Wallet, dand lōr anc la gestiòṅ ad tut i sò avēr. Britney la pōl gnir fóra da 'd là sōl al 6 ad Favràr dal 2008.

In dal Luj dal 2008 la ś mét 'd acòrd cun sò marè par turnàr a védar i sò fiōi ma pò la và còntra a 'l sò muróś Ghalib e a 'l sò ex manager Sam Lufti parchè la gh'iva timōr che lōr dū i traplàsan par purtàr-ag via i sò bèsi. In dal Śnar dal 2009 al tribunàl 'l ōrdna a chi lōr dū da n dśvinàr-as briśa a la cà dla cantànta e ad mét'r-as minga in cuntàt sèg.

The Singles Collection

Òṅ di sò balarèṅ in śnòć par lē

Par selebràr al sò dècim aniversàri dal debùt in dal mónd dla mùśica, in dal Nuvémbar dal 2009 la Spears la fà catàr in di negòsi na secónda racòlta di sò darsèt braṅ più famóś, The Singles Collection. Al sìngul sparâ in apòǵ dal disc 'l è 'l inèdit 3, incóra na vòlta na sò canta bòna a piasàr-as a 'l prim pòst in di Stat Unî.

In dal librét ch'a gh'è dèntar al CD a gh'è na pàgina par tuti al canti, cun dal foto tòlti da i vìddeo prumusiunài cun dal nòti ch'i dascóran di record muciâ sù da tut i sìngui.

«
Countin' one two three, not only you and me, got 180 degrees and I'm caught inbetween, countin' one two three, Peter Paul and Mary, getting down with 3P, everybody loves... uh! What we do is innocent, just for fun and nothing meant, if you don't like the company, let's just do it you and me (you and me...), you and me (you and me), or three (or three, or three), or four on the floor.»
(EN)(3, 2009)
«
A cònt òṅ dū tri, minga sōl mè e tè, un śóg vèrt a tut e mè a gh sòṅ dèntar, a cònt òṅ dū tri, Peter Paul e la Mary, a 'l fag cun àtar tri, a tut a gh piàś... uh! Quél ch'a fém 'l è inusènt, sōl par divartìr-as e sénsa dar-gh a mènt, s'la n t piàś mia la cumpagnìa, fém-al sōl tè e mè (nuàtar dū), tè e mè (nuàtar dū), o tri (o tri, o tri), o quàtar in sal pavimènt.»
(MUD)

In cal mèntar la Spears la taca anc a diśgnàr na lìnnea ad vistî par la marca Candie's, un lavōr ch'a s śònta a quél ad far di parfùm firmâ da lē cuma Curious, Fantasy, Believe o Radiance.

In dal Setémbar dal 2010, la tórna a recitàr in 'n epiśòdi ad Glee intitulâ pròpria Britney/Brittany in dua al cast dal telefilm al canta sinc dal sò canti.

Femme Fatale

Britney dal viṿ in dal 2009

In dal Mars dal 2011 la cantànta americàna la dà vita a 'l sò sètim disc da studi, Femme Fatale, tìtul in francéś ch'al vōl dir Dóna fatàla. Al prim sìngul, Hold It Against Me, dispunìbil p'r èsar dascargâ da la réda da 'l ùndas ad Śnar, al finìs a 'l prim pòst dal vénditi dal sò paéś, vindénd in dla sóla prima stmana un quèl cuma 411.000 còpi.

Al sécond braṅ dal disc vindû da par lò, al quàtar ad Mars, 'l è Till the World Ends, mèntar a gh'è tèmp anc p'r un tèrs sìngul, I Wanna Go e un quàrt, Criminal, gnû fóra in Setémbar in mèś a 'l pulèmichi par via 'd un vìddèo viulént e spurcaciòṅ, in dua la dróa na rivultèla e la và a lèt cun al sò murōś nóṿ Jason Trawick[6].

«
He is a hustler, he's no good at all, he is a loser, he's a bum bum bum bum, he lies, he bluffs, he's unreliable, he is a sucker with a gun gun gun gun, I know you told me I should stay away, I know you said he's just a dog astray, He is a rebel with a tainted heart and even I know this ain't smart, but mama I'm in love with a criminal and this type of love isn't rational, it's physical, mama please don't cry, I will be alright, all reason inside I just can't deny, I love that guy. He is a villain of the devil's law, he is a killer just for fun fun fun fun.»
(EN)(Criminal, 2011)
«
'L è 'n imbrujòṅ, 'l è un pôc ad bòṅ, 'l è un pardènd, 'l è un bum bum bum bum, al diś dal buśìi, al fréga, a n s pōl briśa cuntàr-gh in sima, 'l è un minciòṅ cun na rivultèla, a 'l sò ch'ta m à dit ad star-gh luntàṅ, a 'l sò ch'ta m à dit ad lò ch'l è sōl un caṅ śmarî, 'l è 'n arvèrs cun al cōr curót e a sò anc che quést al n è mia fùrub, ma mama a m sòṅ inamuràda 'd un criminàl e 'l è un genàr 'd amōr séns'usta, 'l è un quèl ad fìśic, mama par piaśér minga piànśar, a m la cavarò, a n gh la caṿ minga a far àtar, a gh vój bèṅ a cal baghét là. 'L è un criminàl e al tîṅ a drē a 'l lèǵ dal Diàvul, al masa sōl par divertìr-as.»
(MUD)

Al disc, ch'l è òṅ di sò lavōr ch'i aṅ vindû da méno ad tut, al gh'à dèntar dódas braṅ ma a gh'è anc na versiòṅ deluxe cun quàtar canti da piò e na versiòṅ giapunéśa cun n'atra bonus track, Scary.

Discugrafìa

Àlbum

Racòlti

  • 2004 - Greatest Hits: My Prerogative
  • 2005 - B in the Mix: The Remixes
  • 2009 - The Singles Collection

EP

  • 2005 - Someday (I Will Understand)

Sìngui

  • 1998 - Baby One More Time
  • 1999 - Sometimes
  • 1999 - (You Drive Me) Crazy
  • 1999 - Born to Make You Happy
  • 2000 - From the Bottom of My Broken Heart
  • 2000 - Oops! I Did It Again
  • 2000 - Lucky
  • 2000 - Stronger
  • 2001 - Don't Let Me Be the Last to Know
  • 2001 - I'm a Slave 4 U
  • 2002 - Overprotected
  • 2002 - I'm Not a Girl, Not Yet a Woman
  • 2002 - Anticipating
  • 2002 - I Love Rock 'n' Roll
  • 2002 - Boys
  • 2003 - Me Against the Music
  • 2004 - Toxic
  • 2004 - Everytime
  • 2004 - Outrageous
  • 2004 - My Prerogative
  • 2005 - Do Somethin'
  • 2005 - Someday (I Will Understand)
  • 2007 - Gimme More
  • 2007 - Piece of Me
  • 2008 - Break the Ice
  • 2008 - Womanizer
  • 2008 - Circus
  • 2009 - If U Seek Amy
  • 2009 - Radar
  • 2009 - 3
  • 2011 - Hold It Against Me
  • 2011 - Till the World Ends
  • 2011 - I Wanna Go
  • 2011 - Criminal

Culegamènt estéran

Nòti