Bigas Luna

Da Wikipedia.
C'l artìcul chè 'l è scrit in Miranduléś Emiliàn


«
Mi ha attratto la sua aria infantile. Ho visto una sua foto sul calendario della IP. E poiché adoro i calendari dei camionisti, l'ho subito appesa nel mio studio.»
(IT)(Bigas Luna al dascór ad Valeria Marini, Dicémbar 1995)
«
Al m à culpî la sò ària da putìna. A-j-ò vist na sò fòto in sal calendàri dla IP. E p'r al fat ch'i m piàśan dimóndi i calendàri di camiunìsta, a l'ò subìt tacàda atàc al mur in dal mè studi.»
(MUD)


Juan José Bigas Luna (Barcelóna, 19 ad Mars dal 1946 – La Riera de Gaià, 6 'd Avrìl dal 2013) 'l è stâ 'n regìsta e scritōr spagnōl.

Biugrafìa

Al catalàṅ Bigas Luna

Dòp avér laurâ in dal giurnalìśum e in dal setór dla literadùra d'l erutìśum, al fà al sò debùt in dal cìnema cun La chiamavano Bilbao (I la ciamàvan Bilbao, 1978), film scûr in dua 'n asasèṅ, ch'al gh'iva na manìa par na dóna, in prinsìpi al la viulénta e pò al la masa.

In dal 1979 'l è la vòlta ad Caniche in du al dascór d'l incèst e dla sudumìa in di cunfrònt dal bèsti.

In dal 1986 al gira Lola na sòrta ad reviśiòṅ a la sò manéra dla Lolita ad Stanley Kubrick. 'L an dòp 'l è al tùran 'd Angoscia un film ad scarésa ambintâ in un cìnema.

In dal 1990 al gira òṅ di sò film più famóś Le età di Lulù, in dua la prutagunìsta Francesca Neri, na baghéta ad quind'ś an, la fà al sò esperiénsi sesuàli in tut al manéri (la s inamóra anc ad sò fradèl) e pò la fà la vitma sadumàś in un lucàl ad gay, in du à gh'è anc un Javier Bardem al sò secónd film. Chi lò 'l è pò al prutagunìsta di sò dū film sucesìṿ.

Al prìm 'l è Prosciutto prosciutto (Parsùt, parsùt, 1992), un film ch'l à vins al leòṅ 'd argìnt al Festival ad Venèsia e ch'l è stâ girâ cun di atōr famōś cuma la Penelope Cruz e al nòstri Anna Galiena e Stefania Sandrelli. Al secónd 'l è Uova d'oro (Óṿ 'd òr, 1993) cun dènt'r anc Alessandro Gassman e Benicio Del Toro, un film dimóndi catìṿ ch'al cònta al vicéndi 'd un palasinàr burghéś ch'al finìs mâl. I óṿ 'd òr dal film i sarésan pò i sò cajòṅ.

Dòp La teta y la luna (La téta e la luna, 1994), un film in dua un putèṅ al béṿ al lat diretamènt dal téti dna balerìna ch'la gh piaśìva dimóndi, in dal 1996 al gira a Cmać in dal fraréś al sò film più cuntruvèrs, Bambola (Bàmbula, un cult movie par soquànt e un cul movie par di àtar), cun Valeria Marini, Jorge Perugorría e na sfata Anita Ekberg. In dal film la Marini la fà da magnàr p'r i camiunìsta in na baràca insém a sò fradèl fnòć (un Stefano Dionisi cun i cavìi usigenâ) e pò la s inamóra 'd un carsérâ ch'al la viulénta, lē e anc al sò vèć murōś faghénd-al dvintàr gay, dand séguit al sò mòt ch'l è: «A 'l dóni at gh'à da dar cas, cas, cas. E bòti!». Da par suo, la Marini la mònta in sima a na murtadèla gigànta in dla lucàndina dal film. Tèrs dascòmad: un capitòṅ.

Dòp al pulèmichi ch'i èṅ gnudi fóra (la Marini la n vliva minga, da bòṅ o da burla, ch'a s vdìsan tut cal séni lè cun lē cavàda śò), al regìsta al gira L'immagine del desiderio (un film dal 1997 cal cònta la stòria dna camaréra dal Titanic), Volavérunt (1999), Son de mar (2001) e Yo soy la Juani (2006), quést chè minga gnû fóra in Itâglia.

In dal 2010 al gira Di Di Hollywood e dū an dòp Segundo Origen, prima 'd murìr ad càncar a cà sua a Tarragona in d'l Avrìl dal 2013.

Filmugrafìa

  • (1976) - Tatuaje
  • (1978) - La chiamavano Bilbao
  • (1979) - Tatuaje
  • (1979) - Caniche
  • (1981) - Reborn
  • (1986) - Lola
  • (1987) - Angoscia
  • (1990) - Le età di Lulù
  • (1992) - Prosciutto prosciutto
  • (1993) - Uova d'oro
  • (1994) - La teta y la luna
  • (1996) - Bambola
  • (1997) - L'immagine del desiderio
  • (1999) - Volavérunt
  • (2001) - Son de mar
  • (2006) - Yo soy la Juani
  • (2010) - Di Di Hollywood
  • (2012) - Segundo Origen

Culegamènt estéran