Basic Instinct
|
C'l artìcul chè 'l è scrit in
Miranduléś |
 Basic Instinct
| ||
| Basic Instinct | ||
 La Sharon Stone in na figùra dal film | ||
| Istìnt primàri 1992 | ||
|---|---|---|
| Regìa: Paul Verhoeven | ||
| Scritōr: Joe Eszterhas | ||
| Atōr: Sharon Stone • Michael Douglas Jeanne Tripplehorn • Denis Arndt • Wayne Knight George Dzundza • Jack McGee • Leilani Sarelle Dorothy Malone • Mitch Pileggi • Chelcie Ross | ||
| Müsica: Jerry Goldsmith | ||
| Léngua: Ingléś | ||
| Dürä dal film: 127 minüt | ||
| Nasiōṅ: Stat Unî • Frància | ||
Basic Instinct (Istìnt primàri) 'l è 'n thriller eròtic dal 1992 ad Paul Verhoeven preśentâ a 'l 45śum Fèstival ad Cannes. 'L à ciapâ dū nomination a i Prèmi Òscar e a i Golden Globe ma al n à minga purtâ a cà gnint.
Al film 'l à muciâ sù dimóndi bèsi a i butghèṅ dal 1992, piasànd-'s in di prim duśènt pòst dla clasìfica dal pelìculi cun più incàs dla stòria (da piò ad tarśènt-sinquànta migliòṅ ad dòlar), e l'à fat cgnós'r in tut al mónd l'atōra prutagunìsta Sharon Stone, anc par via dna séna durànt al sò interugatòri quànd la prila al gambi faghénd védar la pèpa ad sóta la stanlìna parchè la n gh'iva mia al mudàndi adòs.
A gh'è anc un séguit dal 2006: Basic Instinct 2 girâ par Michael Caton-Jones.
Sunt
'L ex muśicìsta rock Johnny Boz (Bill Cable) al vèṅ catâ mòrt in dla sò cambra da lèt masâ cun un śbragagiàs mént'r 'l éra drē a ciulàr. Al tîṅ a drē a 'l caś al detective Nick Curran (Michael Douglas) ch'al s pòrta adrē al scutmàj ad "Giustisēr". Pinsànd ch'a gh pòsa intràr-ag la scritōra e psicòluga Catherine Tramell (Sharon Stone), ch'la s catàva sèg la nòt d'l umisìdi, al và a catàr-la a cà sua insém a 'l sò culéga Gus (George Dzundza) par far-ag dal dmandi. Rivâ là al cata invéci la sò amànta, la Roxy (Leilani Sarelle), ch'la gh diś che la sò murōśa l'è in dla sò vila in sla spiàgia ad Stinson Beach ma ch'l'è sicùra ch'la n gh'èntra minga. Purtàda in dal cumisariâ, la Catherine la rispónd sèmpar franca e pò, sintàda cun sōl na stanlìna curta adòs, la prila 'l gambi faghénd véd'r a i pulisiòt la sò pasra e lōr i pèrd'n al fîł, tàcand a sudàr fréd.
Cla sira lè pò Curran al s litga in un bar cun l'agìnt di afâr intèran Nielsen (Daniel von Bargen) e pò al cumpàgna a cà la sò ex, la psicòluga Beth Gardner (Jeanne Tripplehorn), e sèg al gh'à 'n rapòrt sesuàł dimóndi viulènt.
Nick al pésca anc ad far cōlp su la bèla Catherine ma chi lē invéci la s dà da far par catàr sù dal nutìsi su 'd lò dasfrutànd al sò sex-appeal. In cal mént'r a vèṅ cupâ Nielsen e Curran al pasa di guàj parchè i 'l ìvan vdû quistiunàr-as sèg.