Annalisa Minetti

Da Wikipedia.
C'l artìcul chè 'l è scrit in Miranduléś Emiliàn


«
Senza te sento che la mia vita è difficile ma non è finita, in salita lo so, penso che ce la farò, senza te o con te io volerò.»
(IT)(Senza te o con te, 1998)
«
Sensa ad tè mè a sènt ch'la mè vita l'è dura ma la n è mia finìda, in salìda a 'l sò, a créd ch'a gh la farò, tèg o da par mè a vularò.»
(MUD)


Annalisa Minetti l'è na cantànta itagliàna nada a Rho al 27 ad Dicémbar dal 1976.

Annalisa Minetti insém a 'l vèć presidènt dla repùblica Ciampi

Biugrafìa

Da baghéta la tóś al diplòma in ragiunerìa dòp ch'a quind'ś an la capìs 'd avér na bruta malatìa: la retinìte pigmentóśa cun na degenerasiòṅ maculàra.

La s fà fòrsa e, dòp avér fat la gavéta in dal baléri dla Lunbardî, in dal 1995 l'incìd la canta Metti un lento cun al grup Perro Negro. La próa ad andàr a Sanremo ma la vèṅ scartàda.

In dal 1997 la vèṅ duciàda da 'n talent scout dal sò bandi ch'al pascàva di vólt nóṿ p'r al cuncórs ad Miss Lunbardî e la và a Miss Italia. A s dascór dimóndi ad lē parchè l'è òrba, un quèl mai vist a Säls, ma Annalisa la n vins minga, anc se pò la finìs in dal primi déśi e la pòrta a cà al tìtul ad Miss Gambissime.

'L an dòp la và avànti in dla manifestasiòṅ Sanremo Giovani cun la canta L'eroe sei tu, na cover in itagliàṅ 'd un braṅ ad Mariah Carey, e acsè la pól andàr al Festival ad Sanremo. La sò cansòṅ Senza te o con te la riva prima, davanti a quéla 'd Antonella Ruggiero, e Aldo Busi al s rabìs sèg in dal Dopofestival dgénd ch'l'à abû di vantàś p'r al sò handicap.

La Minetti la fà gnir fóra al sò prim àlbum Treno blu par la Sony ma al disc al vénd pòc. Anc quél d'l an dòp, Qualcosa di più, al rèsta in di negòsi, anc s'l è stâ fat insém a i Pooh, Eros Ramazzotti e Ron.

In di an sucesìṿ la fà gnir fóra di tant in tant di sìngui e la taca a lauràr cun Toto Cutugno.

Dal punt ad vista dla televiśiòṅ, in dal 2004 Annalisa la fà part dal cast dla prima edisiòṅ dal prugràma muśicàl Music Farm cundót par Amadeus, ma la pèrd la gara cun Riccardo Fogli e la vèṅ scartàda dal śóg.

In dal 2012 la và a curàr in di Ulimpìadi di andicapâ a Lóndra vinsénd na mdaja ad brónś in di 1500 faghénd anc al rècord dla clas T11 cun al tèmp ad 4’48’’88[1].

Discugrafìa

Àlbum

  • 1998 - Treno blu
  • 1999 - Qualcosa di più

Sìngui

  • 1995 - Metti un lento (cun i Perro Negro)
  • 1997 - L'eroe che sei tu (Hero)
  • 1998 - Senza te o con te
  • 2000 - Due mondi (versiòṅ latìna dla cansòṅ ad Lucio Battisti)
  • 2000 - Inequivocabilmente tu (scrita da i Pooh)
  • 2000 - La prima notte (remix)
  • 2005 - Come noi nessuno al mondo (cun Toto Cutugno)
  • 2005 - Vita vera
  • 2006 - Stelle sulla terra
  • 2006 - Fammi fuori
  • 2007 - Il cielo dentro me
  • 2008 - Scintilla d'anima

Culegamènt estéran

Nòti

  1. Minetti ad brónś in di 1500 gazzetta.it, 4 ad Setémbar dal 2012