Andy Roddick

Da Wikipedia.
C'l artìcul chè 'l è scrit in Miranduléś Emiliàn
Andy tòlt śò durànt gl'US Open dal 2009
L'americàṅ al s piga par tiràr al servìsi
Alenamènt par Roddick a gl'Australian Open


Andrew Stephen Roddick, dit Andy, (Omaha, 30 'd Agóst dal 1982) 'l è stâ 'n tenìsta americàṅ prufesiunìsta da 'l 2000 a 'l 2012, nùmar òṅ dal mónd par trédas stmani, da 'l 3 ad Nuvémbar dal 2003 a 'l 1 ad Favràr dal 2004. 'L è élt 188 cm e al péśa 88 chilo.

In dla sò caréra Andy 'l à vins un tìtul dal Gran Slam (gl'US Open dal 2003) e sinc Masters 1000, p'r un tutàl ad trénta-dū turnèo ATP (al prim a Atlànta in d'l Avrìl dal 2001).

Al gh'à tri rècord, qvél di śōg purtâ a cà in na finàl dal Gran Slam (39 a Wimbledon 2009), qvél di tiebreak vins ad fila (18 in dal 2007) e qvél dal servìsi più fòrt in un Gran Slam (tirâ durànt gl'US Open dal 2004).

In dal sò caréra 'l à mis in bisàca da piò ad vint migliòṅ ad dòlar in tut, fra singulàr e dópi.

Caréra

In dal 2001 Andy al s fà nutàr a Miami in dua al riva in di quàrt baténd Marcelo Ríos e Pete Sampras ma pò al céd a Lleyton Hewitt par 3-6 2-6. Al fà incóra méj a Atlànta parchè al s pòrta a cà al tìtul mulànd un 6-2 6-4 in 69 minùt a Xavier Malisse. Al vins anc al turnèo sucesìṿ ad Houston. In séguit al bat Michael Chang a 'l Roland Garros in sinc sét 5-7 6-3 6-4 6-7 7-5 ma pò 'l è custrét a bandunàr cóntar Lleyton Hewitt (i éran un sét para). Al finìs 'l an vinsénd al tìtul ad Washington e dvintànd al nùmar 14 dal mónd.

In dal 2002 al śōga tri finàli vinsénd a Memphis cóntar James Blake par 6-4 3-6 7-5 e a Houston baténd Pete Sampras par 7-6 6-3 e pardénd a Delray Beach da 'l itagliàṅ Davide Sanguinetti par 4-6 6-4 4-6. In Maǵ al śōga par la prima vòlta a Róma. Dòp 'l incóntar vins cónt'r al spagnōl Álex Calatrava al dmanda a gl'urganiśadōr 'd a n śugàr piò in sal camp Pietrangeli parchè védar tut cal statṿi ad masć nûd da na banda a gh fava impresiòṅ. Al và pò avànti in fiṅ a la semifinàl in dua però al pèrd da Tommy Haas par 1-6 5-7. Al finìs 'l an da nùmar déś.

In dal 2003 al vins siē turnèo (St. Pölten cóntar Nikolaj Davydenko, Queen's cóntar Sébastien Grosjean, Indianapolis cóntar Paradorn Srichaphan, Montreal cóntar David Nalbandian, Cincinnati cóntar Mardy Fish e gl'US Open cóntar Juan Carlos Ferrero) e al dvénta acsè al nùmar òṅ dal mónd.

In séguit al śōga àtar quàtar finàli ad Gran Slam ma al li pèrd tuti cónt'r al śvìsar Roger Federer.

Finàli in di Gran Slam

Turnéo An Vins/Pardû Aversàri in finàl Puntéǵ
US Open 2003 V Juan Carlos Ferrero 6–3, 7–6, 6–3
Wimbledon 2004 P Roger Federer 6–4, 5–7, 6–7, 4–6
Wimbledon 2005 P Roger Federer 2–6, 6–7, 4–6
US Open 2006 P Roger Federer 2–6, 6–4, 5–7, 1–6
Wimbledon 2009 P Roger Federer 7–5, 6–7, 6–7, 6–3, 14–16

Culegamènt estéran