A Shot at Love with Tila Tequila

Da Wikipedia.

C'l artìcul chè 'l è scrit in Miranduléś Emiliàn

La Tila Tequila tòlta śò in dal 2008


A Shot at Love with Tila Tequila (A 'n pas da 'l amōr cun la Tila Tequila) 'l è 'n reality show televiśìṿ dal 2007 (traśmìs anc in Itâglia p'r MTV) in dua 32 pritindènt (16 masć nurmài e 16 fémni lèśbichi) i gh'aṅ da cunquistàr al cōr dla mudèla e cantànta, uriginària ad Singapōr, la Tila Tequila. Chi lē la gh diś 'd èsar bisesuàla sōl a traśmisiòṅ tacàda, faghénd-i incuntràr in pisìna, sénsa che chi lōr i saìsan gnint ad chi àtar.

I déś epiśòdi (ad ssanta minùt + dū speciài a part) i gh'àṅ abû dimóndi sucès in di Stat Unî tant ch'al spetàcul 'l à fat al sò ingrès in dla clasìfica di più vdû dal rédi via câṿ in dal target di śóvan (18/34 an) a 'l prim pòst. La finàla (in dua la Tila la sarnìs cuma murōś Bobby Banhart invéci dla pumpēra Dani Campbell) l'à muciâ sù pò da piò ad siē migliòṅ ad spetadōr, faghénd dvintar, in alóra, A Shot at Love with Tila Tequila la traśmisiòṅ più vdùda dal canàł MTV americàṅ.

La siggla dal prugràma, I Love U, l'è cantàda pròpria par Tila Tequila.

Regulamènt

La Tila Tequila la pésca 'l amōr e la gh'à da sarnìr òṅ di 32 sò spaśimànt ch'i tōśan part a 'l śōg.

Qvist chè i vàn'n a star in na vila insém a la Tila Tequila e i gh'àṅ da far incòsa par far-la inamuràr, partesipànd a di śōg divertènt o a dal surpréśi, dascurénd sèg e faghénd-as cgnósar méj da lē. A la fiṅ ad tut al puntàdi, la Tila la i mùcia insém in salòt par far-ag savēr, ciamànd-i òṅ a la vòlta par nóm, chi pōl cuntinuàr al śōg (miténd-ag persunalmènt na ciàṿ p'r al sò cōr a 'l còl) e chi invéci al gh'à 'd andàr a cà (dgénd-ag che, par lōr, „a shot at love has ended“).

Durànt al śōg, i cuncurènt i pōlan vìns'r anc 'n apuntamènt cun la Tila in manéra da psēr star un pôc da par lōr.

I partesipànt dal prugràma, in mèś a i quài a gh'è anc 'l itagliàṅ Domenico Nesci (in séguit in dal prugràma L'Isola Dei Famosi), i èṅ qvist chè 'd sóta:

Alex Larson Ashley McNeely Ben Boshnack Bobby Banhart Domenico Nesci Eddie Kaulukukui Eric Bayliss Greg Gildea Lance Brown Marcus Foy Michael Buonanno Michael R. Crisis Rami Najjar Rob Armandi Ryan Creighton Steven Richardson
Amanda Ireton Ashli Haynes Brandi Ryan Brenda Teti Chaos Krieger Dani Campbell Ellie Heagney Grace Soriano Keasha Mendez Krystal White Lala Thomas Rebecca Hollis Sara Shaban Scout Durwood Steffanie Walk Vanessa Romanelli

Eliminasiòṅ

Epiśòdi Persunàǵ Mutìṿ dl'eliminasiòṅ
1 Bennie Blèṅ ma minga al sò tip
Rami La n s 'l arcurdàva minga
Michael R. Minga dit
Lance Minga dit
Greg Al gh'à al ciòld fis dal sès ma lē la pésca quèl àtar
Scout La n s la 'rcurdàva minga
Ellie Tròp timda
Chaos Difìcil inténd'r-as sèg
Brenda Minga dit
Keasha La sènt ch'al suo 'l è un prugèt distrutìṿ
2 Eddie La rispèta al fat ch'al sia vìrgin ma la sènt ch'al n è pò mia acsè inusènt
Marcus A 'l inìsi la s intindìva bèṅ sèg ma pò lò al s è mis a dar vita a di brut mumènt par tròpi vòlti
Steffanie Lè par dū dè ma incóra la n gh la cava minga a cgnósar-la
Grace La sintìva ch'insém i n sarésan minga andâ bèṅ
Lala La s 'n è andàda da par lē parchè la n vliva minga cumpétar cun di masć
3 Rob Al farà cunténta na quàlc atra dóna un dè ma minga lē
Alex La n créd mia ch'i sìan cumpatibìi
Eric La n pénsa minga ch'i psìsan dvintàr na còpia
Krystal A n è minga scrucàda la mòla sèg
Rebecca In dla cà l'iva dâ 'n baś a la Brandi e pò a pâr ch'la gh'àppia di prubléma cun la munugamìa
4 Ashley A parìva ch'al s fus inamurâ tròp in présia ad lē e la sintìva ch'a gh'éra quèl ch'a n andàva minga fra lōr dū
Sara Bèla ragàsa ma la n à mia catâ sèg la vśinànsa ch'la pascàva
5 Michael B. Minga dit
Ashli La n la vliva minga métar in na puśisiòṅ dascòmda
6 Steven La s cata méj cun di àtar mémbar dla cà piutòst che cun lò
Vanessa Minga dit ma in d'l epiśòdi dòp l'à spiegâ ch'la n éra minga la parsòna giùsta
Brandi La lasa da par lē la cà parchè la n psiva minga cuntinuàr acsè dòp che la Vanessa la gh'éra saltàda adòs par piciàr-la quànd l'iva ciapâ lē l'ultma ciàṿ a 'l sò pòst. La próa a turnàr dèntar durànt la puntàda dòp ma la Tila la n la tōś minga in cà par rispèt ad chi àtar e parchè la gh'à paùra ch'la la pòsa mulàr incóra cuma l'iva bèla fat
7 Domenico La s cata méj cun di àtar mémbar dla cà ma la gh fà i sò cumplimènt par la sò manéra 'd èsar
8 Ryan La créd ch'al sò parcōrs e al suo i sìan tròp difarènt e pò la sò famija l'è tròp tradisiunàla e lē la n s catarév minga bèṅ cun cla manéra lè ad vìvar
9 Amanda La gh'à n'intéśa più fòrta cun Bobby e la Dani e pò „I n gh'éran più ciàṿ“
10 Dani La gh vōl bèṅ ma la s è inamuràda ad Bobby. La 'l à fat anc par mét'r al sicûr l'amicìsia cun lē par sèmpar, un quél ch'ad sòlit a n sucéd minga cun i spetàcui in dua a s pésca 'l amōr

Epiśòdi

  • Ep.1 - Surprise! I Like Boys and Girls • (Surpréśa! I m piàśan i masć e al fémni)
  • Ep.2 - Can't We All Just Get Along? • (A n psém-j-a minga andàr tut 'd acòrd?)
  • Ep.3 - Under the Covers • (Sót al quèrti)
  • Ep.4 - A Broken Heart • (Un cōr scavśâ)
  • Ep.5 - I Always Get What I Want • (A gh la cav sèmpar a ciapàr quél ch'a vój)
  • Ep.6 - The Cat Fight • (Al cumbatimènt di gat) śōg in dua a gh'è da far strabucàr par tèra c'l àtar in na lòta a dū
  • Ep.7 - A Second Chance? • (Na secónda ucaśiòṅ?)
  • Ep.8 - Welcome To The Family • (Benvgnû in famìja)
  • Ep.9 - Three's A Crowd • (Tri i èṅ tròp)
  • Ep. 10 - I Choose... • (A sarnìs...)
  • Speciàl - One Shot Too Many • (Un cólp da tròp)
  • Speciàl - The Final Round • (Al round finàl)

Culegamènt estéran